„გამარჯვება მეტოქის მიწაზე გაჩერებისთვის, სიგიჟეა.”

27 აპრილს გამთენიისას გიგა ჭიკაძემ მორიგი ბრძოლა გამართა, დავიდ ონამასთან წინააღმდეგ, რასაც ფანების მხრიდან არაერთგვაროვანი რეაქცია მოჰყვა. როგორი ირონიულიც არ უნდა იყოს, ქართველებისგან ძალიან დიდი ნეგატივი წამოვიდა, მაშინ როდესაც UFC-ის ამერიკელი ფანები ფიქრობენ, რომ გიგას მოგება მოჰპარეს. ბრძოლის დასრულების შემდეგ დარწმუნებული არ ვიყავი თუ ვინ წაიღებდა ბრძოლას, თუმცა კანზას სითიში, ონამას მშობლიურ ქალაქში, გამარჯვება უგანდელ-ამერიკელს მიანიჭეს - 29:28.

რამ გამოიწვია აზრთა სხვადასხვაობა?

გიგამ პირველი რაუნდი უპირობოდ წამოიღო და ამაში მსაჯებიც დაგვეთანხმნენ. გიგა დგომში ძალიან კარგად გამოიყურებოდა, ძალიან კარგად ცვლიდა სართულებს, ფეხში თუ ტანში მძიმე დარტყმებს უშვებდა. ბოლოს თავშიც ავიდა და რამდენიმეჯერ მეტოქე წააბარბაცა კიდეც. ონამა, აშკარად, ყველა დარტყმას გრძნობდა და ბოლოს გადარჩენის მიზნით გიგას წაქცევა განიზრახა, რაც, სამწუხაროდ, წარმატებით გააკეთა, თუმცა, პირველი რაუნდი მაინც გიგასი იყო - დიდი უპირატესობით.

მეორე რაუნდში, ონამამ იგრძნო, რომ დგომში საქმე კარგად არ მისდიოდა და შანსები მიწაზე უნდა მოეძებნა, შესაბამისად თავიდანვე ჭიდაობა დაიწყო და რაუნდიც წარმატებით ჩაატარა. კითხვის ნიშნები მესამე რაუნდმა გამოიწვია. საბოლოო რაუნდის პირველ ნახევარში საკმაოდ ახლო ბრძოლა მიდიოდა, მაგრამ დგომში გიგა კარგ დარტყმებს უტარებდა და ნელ-ნელა უპირატესობას თავის მხარეს ქაჩავდა. მაგრამ, როგორც კი ონამამ ეს იგრძნო, ფეხში შევიდა, მეტოქეები თავებით დაეჯახნენ ერთმანეთს და საბოლოოდ მიწაზე აღმოჩნდნენ.

ვინც მიცნობს ყველამ იცის, რომ ჭიდაობით ბრძოლის და რაუნდის განაღდება ჩემი საყვარელი ჭკვიანური საქციელია და ძალიან მომწონს, როდესაც მებრძოლებისგან ამას ვხედავ, მაგრამ რამდენად იყო საკმარისი ონამას აქტივობა ბრძოლის მოსაგებად?

დევიდმა გიგა მიწაზე კი გადაიყვანა, თუმცა აღარაფერი შემოუთავაზებია, მეტიც, გიგა უფრო მეტს მუშაობდა. რეალურად ონამა თამაშს კლავდა და დრო გაჰყავდა, რამაც ადგილობრივი ხალხისგან სტვენა და უკმაყოფილება გამოიწვია.

მეორე საკითხია ის, რომ დევიდ ონამა TOP 15-ში შესასვლელად იბრძოდა. გიგა უკვე ვეტერანია, ონამა კი დივიზიონის ახალი სისხლია, რეიტინგში ახალი სახის გამოჩენა ორგანიზაციასაც აწყობს.

ჩემი აზრით, ამ ბრძოლას ძარცვას ვერ დავარქმევთ, რადგან დაპირისპირება საკმაოდ დაძაბული იყო, ეს მოგება ნებისმიერი მიმართულებით შეიძლებოდა წასულიყო, თუმცა იმ ფანებისაც მესმის, რომელთაც ჰგონიათ, რომ გიგას გამარჯვება წაართვეს, რადგან ონამა ბრძოლას გაექცა და ბოლო 10 წამის გამოკლებით მიწაზეც მხოლოდ კონტროლით შემოიფარგლა.

რა იქნება გიგასთვის შემდეგი?! - ბუნდოვანია. იგი რეიტინგში მე-12 პოზიციას იკავებდა, ახლა „ნინძას" ონამა ჩაანაცვლებს. მის ქვემოთ იუსუფ ზალალია, უდიდესი ალბათობით, გიგას ისიც გაუსწრებს. ზალალი უკანასკნელ ბრძოლებში ძალიან კარგად გამოიყურებოდა.

რეიტინგში ასევე არიან დენ იგე, რომელმაც ბოლო ბრძოლა მოიგო, თან როგორც ანდერდოგმა, და კელვინ კატარი. კელვინ კატარზე ორი ფაქტორია გასათვალისწინებელი, ის რომ 4-წაგებიან სერიაზეა და რატომაც არა რომ გააგდონ TOP 15-დან, თუმცა მას გიგა ჰყავს დამარცხებული.