21 იანვარს, თბილისის დროით, 22:00 საათზე საქართველოს ფუტსალის ეროვნული ნაკრები, ჩვენი ქვეყნისთვის მეორე ევროპის ჩემპიონატზე ასპარეზობას დაიწყებს.
ევროპირველობა 21 იანვრიდან 7 თებერვლის ჩათვლით სლოვენიაში, ლატვიასა და ლიეტუვაში გაიმართება.
საქართველოს ნაკრები A ჯგუფში იასპარეზებს, სადაც ჩვენი გუნდის მეტოქეები ლატვია, ხორვატია და საფრანგეთი იქნებიან.
პირველად ევროპის ჩემპიონატზე
საქართველოს ფუტსალის ნაკრებმა პირველად ევროპის ჩემპიონატზე 2022 წელს იასპარეზა. სადებიუტო ევროპირველობა ჩვენმა გუნდმა აზერბაიჯანის ნაკრებთან გამარჯვებით გახსნა. საქართველომ ჯგუფურ ეტაპზე ასევე ბოსნია-ჰერცეგოვინას მოუგო და ავთანდილ ასათიანის გუნდმა ნაადრევად მოიპოვა მეოთხედფინალის საგზური და კონტინენტის რვა საუკეთესო გუნდს შორის მოხვდა. ჯგუფურ ეტაპზე ჩვენმა გუდმა ესპანეთის ნაკრებთან წააგო.
მეოთხედფინალში საქართველო რუსეთის ნაკრებს დაუპირისპირდა და ევროპირველობის მომავალ ფინალისტთან 1-3 წააგო.
ჩვენი გუნდისთვის სადებიუტო ევროპირველობა წარმატებული აღმოჩნდა, რადგან გულშემატკივარს ხარისხიანი თამაშით დაამახსოვრა თავი და დებიუტანტმა გუნდმა მეოთხედფინალში იასპარეზა.
2026 წლის ევროპის ჩემპიონატამდე
წინა ევროპის ჩემპიონატთან შედარებით, საქართველო ნაკრებში მნიშვნელოვანი ცვლილებებია. განახლებულმა გუნდმა ევროპის ჩემპიონატის საგზურის მოსაპოვებლად გზა დამაჯერებლად გაიარა და სრულიად დამსახურებულად მოიპოვა ევროპის ჩემპიონატზე ასპარეზობის უფლება.
მეინ რაუნდის ჯგუფში, სადაც საქართველო, საფრანგეთის, ბულგარეთისა და კოსოვოს ნაკრებებთან ერთად ასპარეზობდა, მე-2 ადგილი დაიკავა და ევროპირველობისთვის ბრძოლა პლეიოფში გააგრძელა. აღსანიშნავია, უძლიერეს საფრანგეთთან ჩვენმა გუნდმა ფრედ, 3:3 ითამაშა და საფრანგეთის ნაკრებმა მეინ რაუნდში პირველი ქულები სწორედ თბილისში დაკარგა, თუმცა ჯგუფი პირველ ადგილზე დაასრულა.
გადამწყვეტი ორმატჩიანი დაპირპირება სლოვაკეთთან შედგა. პლეიოფის პირველ შეხვედრაში საქართველომ 4:1 მოიგო, ბრატისლავაში გამართულ დაძაბულ მატჩში 5:3 წააგო, ორი თამაშის ჯამში კი გაიმარჯვა და ევროპის ჩემპიონატზე ასპარეზობის უფლება ზედიზედ მეორედ მოიპოვა.
ევროპირველობისთვის მზადების ფარგლებში საქართველოს ნაკრებმა ყირგიზეთთან 2 ამხანაგური მატჩი გამართა, (3:2, 2:2) ასევე ესტონეთთან (5:0, 10:0), დეკემბრის ბოლოს კი ერევნის საერთაშორისო ტურნირზე იასპარეზა, სადაც მოლდოვას 5:1 მოუგო, მასპინძელ სომხეთთან 3:1 წააგო და ტურნირი მეორე ადგილზე დაასრულა.
აღნიშნულ შეჯიბრებაზე ყირგიზეთის ნაკრები სომხეთში უამინდობის გამო ვერ ჩავიდა.
იანვარში საქართველოს ნაკრები თბილისში შეიკრიბა და ევროპირველობისთვის ვარჯიში გააგრძელა.
ჩვენი გუნდი რიგაში 18 იანვარს ჩავიდა და მზადებას ადგილზე აგრძელებს.
საქართველოს ნაკრების შემადგენლობა
გუშინ საქართველოს ნაკრების მთავარმა მწვრთნელმა, ავთანდილ ასათიანმა ევროპის ჩემპიონატისთვის 14-კაციანი განაცხადი დაასახელა.
მეკარე: თორნიკე ბუკია (ნიუ-ვიჟენ ჯორჯიანსი), ალი ასლანი (კსუ)
წინა ხაზი:გიორგი ჩიმაკაძე (კსუ), ვახტანგ კეკელია(ნიუ-ვიჟენ ჯორჯიანსი), არჩილ სებისკვერაძე (კსუ), ირაკლი თოდუა(ნიუ-ვიჟენ ჯორჯიანსი), ვახტანგ ჯვარაშვილი (ნიუ-ვიჟენ ჯორჯიანსი), ჯანო კვარაცხელია (ფაკელი, რუსეთი), ნიკოლოზ გაბრიჩიძე(ნიუ-ვიჟენ ჯორჯიანსი), ნუკრი ჭუმბურიძე (ნიუ-ვიჟენ ჯორჯიანსი), საბა ტყეშელაშვილი (კსუ),ჯანიკო გიორგაია (კსუ),გიორგი ღავთაძე (ტიუმენი, რუსეთი), შოთა თოფურია (ნიუ-ვიჟენ ჯორჯიანსი)
საქართველოსფუტსალისნაკრებისჯგუფურიეტაპისმატჩებისგანრიგი
21 იანვარი| ლატვია - საქართველო (რიგა, ლატვია)
25 იანვარი| ხორვატია - საქართველო (რიგა, ლატვია)
28 იანვარი| საქართველო - საფრანგეთი (კაუნასი, ლიეტუვა)
ფოტო: საქართველოს ფეხბურთის ფედერაცია
