საფრანგეთის ქალაქ ავინიონში ევროპის ველოსპორტის კავშირის UEC-ის 38-ე საერთაშორისო კონგრესი გაიმართა.
კონგრესში წარმოდგენილი იყო ევროპის 46 ქვეყნის ეროვნული ველოსპორტის ფედერაცია, მათ შორის საქართველოდა, ფედერაციის პრეზიდენტი ომარ ფხაკაძე და გენერალური მდივანი კახაბერ ლოსეურაშვილი.
ღონისძიებას ასევე ესწრებოდა საერთაშორისო ველოსპორტის კავშირის (UCI) პრეზიდენტი დავიდ ლაპარტიენი.
კონგრესზე განიხილეს ევროპის კონტინენტზე ველოსპორტის განვითარების ძირითადი მიმართულებები, 2025 წლის მნიშვნელოვანი სპორტული მოვლენები და 2026 წლის სამოქმედო გეგმები. განსაკუთრებული ყურადღება დაეთმო საერთაშორისო თანამშრომლობის გაძლიერებას, ეროვნული ფედერაციების როლის ზრდას და ველოსპორტის უფრო მეტად განვითარებას ევროპულ სივრცეში.
აღსანიშნავია, რომ საქართველოს ველოსპორტის ეროვნული ფედერაცია 2025 წლის დეკემბრიდან ჩართულია საერთაშორისო ველოსპორტის კავშირის (UCI) სოლიდარობის პროგრამაში. აღნიშნული პროგრამის ფარგლებში ქართველმა სპორტსმენებმა უკვე მიაღწიეს მნიშვნელოვან წარმატებებს და პორტუგალიაში გამართულ საერთაშორისო შეჯიბრებებზე ოქროს მედლები მოიპოვეს.
2026 წლისთვის დაგეგმილია საქართველოს ველოსპორტის ეროვნული ფედერაციის ჩართულობის კიდევ უფრო გაფართოება საერთაშორისო პროგრამებსა და პროექტებში. აღნიშნული მიმართულება მნიშვნელოვნად შეუწყობს ხელს ფედერაციის განვითარებას, საერთაშორისო თანამშრომლობის გაძლიერებასა და ქართული ველოსპორტის საერთაშორისო ასპარეზზე კიდევ უფრო წარმატებულ წარმოჩენას.
შეგახსენებთ, მსოფლიო ველოსპორტის კავშირის პრეზიდენტის არჩევნებზე, რომელიც 2025 წლის შემოდგომაზე გაიმართა, 50 ხმის მიმცემ კანდიდატს შორის აირჩა 15 წევრი, მათ შორის საქართველოს ველოსპორტის ეროვნული ფედერაციის პრეზიდენტი, ომარ ფხაკაძე,რაც წარმოადგენს მნიშვნელოვან აღიარებას და საქართველოს ველოსპორტის საერთაშორისო პოზიციის გაძლიერების შესაძლებლობას.
შეხვედრების ფარგლებში განსაკუთრებული ყურადღება დაეთმო ველოსპორტის განვითარების სტრატეგიულ საკითხებს, სპორტსმენების მხარდაჭერის მექანიზმებსა და საერთაშორისო თანამშრომლობის გაღრმავებას. მხარეებმა გამოთქვეს მზადყოფნა პარტნიორობის გაგრძელებისა და ერთობლივი პროექტების განხორციელებისთვის, ველოსპორტის შემდგომი განვითარების მიზნით.
კონგრესზე ასევე მკაფიოდ იქნა ხაზგასმული დოპინგის წინააღმდეგ ბრძოლის მნიშვნელობა. აღინიშნა, რომ აკრძალული პრეპარატების გამოყენება და დოპინგზე დისკვალიფიცირებული პირების ჩართულობა სპორტულ ორგანიზაციებში ეწინააღმდეგება სპორტის ფუნდამენტურ პრინციპებს, აფერხებს ახალგაზრდა სპორტსმენების განვითარებას და აზიანებს ქვეყნისა და სპორტის რეპუტაციას საერთაშორისო ასპარეზზე.
