საქართველოში ახალი პროფესიონალური საბრძოლო ლიგა – GCL (Georgian Combat League MMA) ჩამოყალიბდა. 18 იანვარს ორგანიზაციის ოფიციალური პრეზენტაცია გაიმართა.
GCL-ის მთავარი მისიაა რეგიონებში ნიჭიერი ახალგაზრდა სპორტსმენების აღმოჩენა, განვითარება და მათთვის დიდ სპორტულ ასპარეზზე მოხვედრაში მხარდაჭერა იქნება.
ღონისძიებები საქართველოს სხვადასხვა რეგიონში ჩატარდება. წელის განმავლობაში დაგეგმილია 7-8 შეჯიბრების გამართვა.
ტურნირს ქუთაისი, ბათუმი, სვანეთი, რუსთავი, თელავი, მარნეული, გორი და ამბროლაური უმასპინძლებს, ხოლო სეზონის დასკვნითი მასშტაბური ღონისძიება თბილისში ჩატარდება.
რეგიონულ ტურნირებზე გამარჯვებული და გამორჩეული სპორტსმენები მიიღებენ შესაძლებლობას იასპარეზონ წლის ფინალურ ღონისძიებაზე, სადაც შეირჩევა ქვეყნის საუკეთესო მებრძოლები და მათ კარიერაში ახალი ეტაპი დაიწყება.
GCL-ის პრეზიდენტი ვალერი კოღუაშვილია. ორგანიზაციას ოფიციალური აღიარება მიანიჭეს, პანკრატიონისა და გრეპლინგის ფედერაციის პრეზიდენტმა, კობა ტყეშელაშვილმა და შერეული საბრძოლო ხელოვნებების (MMA) ფედერაციის პრეზიდენტმა, გიორგი კაბულაშვილმა.
ვალერი კოღუაშვილი (GCL-ის პრეზიდენტი): GCL ემსახურება რეგიონებში ახალგაზრდა ნიჭიერი მებრძოლების აღმოჩენას. ვგეგმავთ 8 ივენთის ჩატარებას, დავიწყებთ ქუთაისიდან და პატარ-პატარა რეგიონებს დავაკვირდებით, ბევრი ნიჭიერი მებრძოლი გვყავს და მათთვის მხარდაჭერა მნიშვნელოვანია. 7 ღონისძიებას საქართველოს სხვადასხვა რეგიონში ჩავატარებთ, დასკვნითი ივენთი თბილისში იქნება და გამორჩეულ მებრძოლებს დავეხმარებით კარიერა სხვადასხვა დიდ ორგანიზაციაში გააგრძელონ.
გიორგი კაბულაშვილი (GFC-ის პრეზიდენტი): GCL-ის ძირითადი აქცენტი იქნება რეგიონები, ივენთების უმრავლესობა საქართველოს სხვადასხვა რეგიონში ჩატარდება. მე, როგორც პრეზიდენტმა მივეცი უფლება, დაფუძნდეს ახალი ორგანიზაცია და ვუცხადებ მხარდაჭერას. მჯერა იქნება ძალიან დიდი მხარდაჭერა არამარტო ფედერაციიდან, არამედ რეგიონის სამსახურებისა და სპორტის სამინისტროს მხრიდან. იმედი მაქვს, ბევრი ახალგაზრდა დაკავდება საბრძოლო სახეობებით და რა თქმა უნდა, რეგიონებში შეჯიბრების ჩატარება გაზრდის კონკურენციას.
გიორგი ქართველიშვილი (MMA მებრძოლი): ძალიან მნიშვნელოვანია GCL-ის ჩამოყალიბება, რათა რეგიონებს მოიცავს. გვინდა რეგიონებში აღმოვაჩინოთ ნიჭიერი მებრძოლები. დასკვნითი ღონისძიება თბილისში გაიმართება, რომელ ივენთსაც ილია თოფურიას მენეჯერი დააკვირდება და შესაძლებლობა ექნება WOW-ში ასპარეზობის შესაძლებლობა მიეცემა ქართველ მებრძოლს.
GCL-ის მთავარი მიზანია, რეგიონებში დაფარული ნიჭის აღმოჩენა, ახალგაზრდა სპორტსმენების მხარდაჭერა და მათი მომზადება საერთაშორისო ასპარეზისთვის, ისეთ დიდ ორგანიზაციებში გადასასვლელად, როგორიცაა - WOW, BRAVE CF,Bellator, PFL და UFC.
