დასრულდა GFC-ის 34-ე ივენთი, რომელზეც მაყურებელმა არაერთი საინტერესო ბრძოლა იხილა. ღონისძიება გაიხსნა მირზა გაჯიევის ეფექტური საბმიშენით მურვეტ რუსტამოვის წინააღმდეგ. მათ გარდა, პრელიმში ასევე იჩხუბეს ლევან დარასელიამ, მარსაგი მარსაგიშვილმა და სანდრო ტატანაშვილმა.
სამივე ქართველმა მებრძოლმა გამარჯვება მოიპოვა. მეინ ქარდი გაიხსნა გოგონების ბრძოლებით - თეონა ფიროსმანაშვილმა კრივში დაამარცხა ნარგეს ზაკავი, ბორენა ცერცვაძემ კი მობინა ბანანატაი. მივადექით ფინალურ სამეულს და ისევ ქართველი მებრძოლის დომინაცია: გენადი ჟორჟოლიანის დარტყმებს აკბარ ბეჰნიაპორმა ერთი რაუნდიც ვერ გაუძლო.
გამარჯვება ასევე მოიპოვა მერაბ მამფორიამ, რომელმაც თურაჯ ალიევი დაამარცხა. ბოლოს კი მსუბუქი წონითი დივიზიონის სატიტულო ჩხუბი: ნიკა ჯაკონია რობსონ კავალკანტეს წინააღმდეგ. გამონაკლისი არც სატიტულო ბრძოლაში მომხდარა: კიდევ ერთი ქართველი მებრძოლის მოგება, თანაც საჩემპიონო.
"ბუგიმენმა" ბრაზილიელი მოწინააღმდეგე დაამარცხა მსაჯების ერთსულოვანი გადაწყვეტილებით და GFC-ის მსუბუქი წონითი დივიზიონის საჩემპიონო ქამარი დაისაკუთრა.
