ბიძინა გავაშელიშვილი მოსამზადებელ პროცესს გაივლის ლას ვეგასში, მერაბ დვალიშვილთან. Brave CF-ის უმსუბუქესი დივიზიონის მებრძოლი UFC-ის ქართველ ჩემპიონთან გაჩერდება ორი თვით და ამ დროის მანძილზე ის ახალ პრაქტიკას მიიღებს. LaGazzetta.ge დაუკავშირდა 27 წლის მებრძოლს და მასთან ინტერვიუ ჩაწერა.
- ახალი გამოცდილების მისაღებად მიდიხარ აშშ-ში, ლას ვეგასში, მერაბ დვალიშვილთან. რა მოლოდინი გაქვს და როგორ მოხდა ამ ყველაფრის დაორგანიზების პროცესი?
- დიახ, როგორც რამდენიმე თვით ადრე ვთქვი ჩემი ბრძოლის შემდეგ მინდოდა წამოსვლა, იმისათვის რომ ჩემი თავის საუკეთესო ვერსია შევქმნა, ისევ და ისევ ჩემი მიზნების მისაღწევად. ამაში SMH Sport-ი და თვითონ მერაბი ძალიან დამეხმარნენ, ძირითადად ვიზის და ჩემი აქ გამომგზავრება SMH Sport-მა, კონკრეტულად კი კახა ჩიქოვანმა და ლაშა მაჭავარიანმაუზრუნველყო, რისთვისაც ძალიან მადლიერი ვარ, ასე რომ მიდგანან გვერდში.
ამ პროცესშიც და ასევე სახლი და დარბაზის უზრუნველყოფა კი მერაბმა აიღო საკუთარ თავზე. როგორც ყოველთვის ეს კაცი გულკეთილობის და გვერდში დგომის მაგალითია, რომ არა ის ძალიან გაჭირდებოდა აქ ყოფნა და ვარჯიში. მოგეხსენებათ ამ ყველაფერს საკმაოდ დიდი ფინანსები დრო და მობილიზება სჭირდება, მაგრამ როცა ქართველ სპორტსმენებს გვყავს ასეთი პიროვნება, ბევრად გვიმარტივდება ამ ყველაფრის გავლა.
- MMA საქართველოში დღითიდღე უფრო და უფრო პოპულარული ხდება. როგორ შეაფასებდი ამ ყველაფერში მერაბის როლს და შენი აზრით, რამდენად რეალურია საქართველოში UFC-ის ივენთის ჩატარება?
- ბევრჯერ მითქვამს და ახლაც გავიმეორებ, რომ MMA ჩვენი ისტორიიდან და შემდგომ გენეტიკიდან გამომდინარე ძალიან ახლოს არის ჩვენს ხალხთან. რა თქმა უნდა, არ შეიძლება იმის გვერდის ავლა, თუ რა გააკეთა და რას აკეთებს მერაბი ამ სპორტში, ის ნამდვილი ლეგენდაა, არა მარტო საქართველოსთვის, არამედ ზოგადად ამ სპორტში.
თავისი დამსახურებით, ის ყველა დროის საუკეთესოა თავის დივიზიონში და ამას რეზიუმე მოწმობს, შესაბამისად, ზუსტად ეს ყველაფერია ახალგაზრდა თაობისთვის მოტივაციის და იმედის მომცემი, რომ ყველაფერი შესაძლებელია, თუ ძალიან მოინდომებ და სწორად იშრომებ.
რაც შეეხება UFC საქართველოს, ვფიქრობ, ძალიან ახლოს ვართ და ვისურვებდი ჩემი UFC-ის დებიუტი ზუსტად საქართველოში შედგეს, ჩემი ხალხის გარემოცვაში.
- შენს სამომავლო გეგმებზე ვისაუბროთ. Brave CF-ში უკვე 4 ბრძოლა დაგიგროვდა...რა იქნება შემდეგ, სავარაუდო მეტოქეები ხომ არ გყავს უკვე შერჩეული?
-დიახ, Brave CF-ში უკვე 4 ბრძოლა ჩავატარე, საიდანაც სასიამოვნო გამოცდილება მივიღე, დიდ წინსვლასთან ერთად. ახლა კი ველოდები ბრძოლას შემდეგი წლიდან ვფიქრობ რომელიმე ტოპ 5-ის მებრძოლთან იქნება დაპირისპირება, ამჟამათ თავისუფალია ერთი ამერიკელი მებრძოლი, რომელიც UFC-ის ყოფილი მებრძოლია და Brave CF-ში ორი წონის ყოფილი ჩემპიონი, MMA-ში დიდი სახელი აქვს, მე კი ყოველთვის საუკეთესოებთან მსურს ბრძოლა, შესაბამისად, სავარაუდო ოპონენტად მას მივიჩნევ.
- 27 წლის ასაკისთვის დაგიგროვდა 19 ბრძოლა, რაც საკმაოდ სოლიდური გამოცდილებაა. რომელია შენი კარიერის საუკეთესო მომენტი?
- ეს გზა 18 წლის ასაკში დავიწყე, როდესაც პირველი პროფესიონალური ბრძოლა ჩავატარე. ვფიქრობ რთული და საინტერესო გზა იყო, რომელმაც აქამდე მომიყვანა, თუმცა საუკეთესო მომენტი ჯერ კიდევ წინაა, ეს მაშინ იქნება როცა უფლის ნებით და ჩემი სწორი და თავდაუზოგავი შრომით UFC-ის Flyweight ჩემპიონი გავხდები.
