ოდესღაც, ამ დივიზიონის ტახტზე ანდერსონ სილვა - უნიკალური სტრაიკერი და ბრაზილიური ჯიუ ჯიცუს შავი ქამარი დიდი ხნის განმალობაში იჯდა. თუმცა, მას შემდეგ, რაც მან ქამარი დაკარგა საშუალო წონაში ჩემპიონი არაერთხელ შეიცვალა. „ობობას" შემდეგ Middleweight-ს ახალ ჰეგემონად ისრაელ ადესანია მოევლინა. იგი სამი წლის განმალობაში ფლობდა დივიზიონის ოქროს, თუმცა ალექს პერეირას გამოჩენასთან ერთად, ადესანიას დომინაცია დასრულდა.
შემდეგ იყო The Last Stylebender-ის შურისძიება და შონ სტრიკლენდის სენსაცია. UFC-ის საშუალო წონაში ახლა ახალი - დრიკუს დუ პლესის ეპოქა დგას. უცნაურმა სამხრეთაფრიკელმა ლეგიტიმაცია სწორედ ადესანიას დამარცხებით მოიპოვა. რა არის ჩემპიონისთვის შემდეგი? მის მსხვერპლთა რიგებში უკვე მოიძებნებიან საშუალო წონის ისეთი ელიტარული მებრძოლები, როგორებიც რობერტ უიტეკერი, შონ სტრიკლენდი და ისრაელ ადესანია არიან. „სამეფო კარის თამაშებისა“ და საჩემპიონო ასპარეზზე განვითარებული ინტრიგების პარარელურად, ბრაზილიელი ვარსკვლავი - კაიო ბორალიო დივიზიონის იერარქიაში დაწინაურებას მეთოდურად აგრძელებს, რამდენიმე დღეში კი ტოპ 5-ში ადგილის მოსაპოვებლად იბრძოლებს. იმისთვის რომ სატიტულო გარჩევაში ჩაებას, ბორალიოს საშუალო წონის რეიტინგის მე-5 ნომრის, ჯარედ კანონიერის, დამარცხებს მოუწევს, რომელიც UFC-ში დივიზიონის ფიზიკურად ყველა ძლიერ ათლეტად მიიჩნევა.
#5 VS. #12 — ვის რა შანსები აქვს?
კანონიერი დივიზიონის ერთ-ერთი ყველაზე გამოცდილი და ათლეტური მებრძოლია, თუმცა გამოცდილებასთან ერთად, მას ასაკიც საკმაოდ სოლიდური აქვს. იგი უკვე 40 წლისაა და ბრძოლის გარკვეულ ეტაპებზე ეს მას ეტყობა. ჯარედმა UFC-ის კარიერა მძიმე წონაში დაიწყო, დიდი ბიჭების დივიზიონში მან რამდენიმე გამარჯვებაც მოიპოვა. შემდეგ ქვემძიმე წონაში ჩავიდა, რამდენიმე მოგებისა და მარცხის შემდეგ კი თავი საშუალო წონაში დაიმკვიდრა. 84 კგ. წონით კატეგორიაში კანონიერი ელიტარული მებრძოლი გახდა. მან 2022 წლის დეკემბერში სტრიკლენდი 5-რაუნდიან ბრძოლაში დაამარცხა. შანსი არ დაუტოვა არც იტალიელ მებრძოლს, მარვინ ვეტორის. უკანასკნელ ბრძოლაში, რომელშიც ნასურდინ იმავოვს დაუპირისპირდა, მისი სტარტი არაჩვეულებრივი იყო. დგომში იმავოვს მან არაერთი ძლიერი დარტყმა გაუტარა და, როგორც MMA-ის ნამდვილმა მებრძოლმა, პროცესში მეტოქეს გრეპლინგიც შესთავაზა. ჯარედმა დაღესტნური წარმოშობის ფრანგს პირველი რაუნდი დამაჯერებლად წაართვა. არც მეორე რაუნდი დაიწყო ცუდად - იდეალურად ახერხებდა ძლიერი დარტყმების ჩასმას, იმავოვს ფეხიც ატკინა, ფიზიკურობის ხარჯზე ჭიდაობის გაცვლებშიც მარტივად ჯაბნიდა, თუმცა მეორე რაუნდის ბოლოს იმავოვმა ბრძოლაში გარდატეხის შეტანა დაიწყო. აშკარა გახდა, რომ კანონიერი მარტივად იღლებოდა. მიუხედავად იმისა, რომ ჯარედი UFC-ის ვეტერანია, უკვე 40 წლისაა და ძალიან დიდი კუნთოვან მასას ატარებს, ერთადერთი ბრძოლა, რომელშიც მისი დაღლა ვნახეთ სწორედ იმავოვთან დაპირისპირებაა. თუმცა, უნდა აღინიშნოს, რომ ტექნიკური თვალსაზრისით კანონიერი ხარისხს არ აგდებს და კვლავ მოწოდების სიმაღლეზეა. აღსანიშნავია, რომ იმავოვთან ბრძოლამდე, უკანასკნელი ხუთი ბრძოლიდან მხოლოდ ერთი დათმო - კარიერის პიკში მყოფ ჩემპიონ ადესანიასთან, რომელთანაც ოქტაგონზე ხუთი რაუნდი გაატარა.
მიუხედავად იმისა, რომ კაიო ბორალიომ Dana White Contender series-ზე ბრძოლები 2021 წელს ჩაატარა და UFC-ში 2022 წლიდან გამოდის, შეგვიძლია ბრაზილიელი საშუალო წონის ახალ პერსონაჟად მაინც მივიჩნიოთ. იგი რეიტინგში ჯერ მხოლოდ მე-12 პოზიციაზეა, თუმცა უკვე მოასწრო და შეიძინა ის რეპუტაცია რითაც, ტოპ 5-ში მოსახვედრი ბილეთი დაიმსახურა. ბორალიოს მარტივი გზა ნამდვილად არ გამოუვლია. UFC-ში მისი დებიუტი დაუმარცხებელი მებრძოლის, გაჯი ომარგაჯიევის წინააღმდეგ შედგა, გამარჯვება კი საკმაოდ დამაჯერებლად მოიპოვა. მისი ერთ-ერთი ყველაზე საინტერესო ჯახი არმან პეტროსიანთან გამოვიდა. კიკბოქსინგზე აქცენტირებულ მებრძოლთან ბორალიო დგომშიც საკმაოდ აგრესიულად გამოიყურებოდა, ამასთან ერთად, მისი ძირითადი გეგმა, რომელიც ბრძოლის მიწაზე გადაყვანას გულისხმობდა, საკმაოდ კარგად შეასრულა. ერთადერთი კომპონენტი, რომელშიც ბორალიოს მინუსები გამოჩნდა, კარდიოა. მისი გამძლეობის მიმართ ეჭვების საპასუხოდ, ბორალიომ მომდევნო ბრძოლებშიც მსაჯთა გადაწყვეტილებით გაიმარჯვა - მახმუდ მურადოვისა აბუს მაგომედოვის წინააღდეგ. მისი უკანასკნელი ბრძოლა პოლ კრეიგის წინააღმდეგ მიმდინარე წლის მაისში ვიხილეთ. კაიომ მოახერხა და შოტლანდიელთან UFC-ის კარიერის პირველი ნოკაუტი აიღო.
ბორალიოს სრულყოფილ მებრძოლად ჩამოყალიბების პოტენციალი აქვს. იგი იდეალურია პარტერში, არის ბრაზილიური ჯიუ ჯიცუს შავი ქამრის მფლობელი და გამუდმებით ახერხებს დომინანტური პოზიციების მოპოვებასა და მდგომარეობის ხარისხიან კონტროლს. მისი სტრაიკინგი მისი თანამემამულის, ლიოტო მაჩიდას სტილის მსგავსია - კარატეს გაშლილი დგომი, სწრაფი გადაადგილების ხარჯზე დისტანციის ჩახურვის უნარი და გამოზომილი, ეფექტური დარტყმები. თუმცა, მას კვლავ აქვს რამდენიმე მინუსი.
კარდიო და დგომი: როგორც უკვე აღვნიშნეთ, იმ კომპონენტებიდან, რომლებზეც ბორალიოს სამუშაო აქვს, ერთ-ერთი კარდიოა. 3-რაუნდიანი ბრძოლების მოგებას კაიო გადაწყვეტილებებითაც ახერხებს, თუმცა შეძლებს თუ არა იმავეს გაკეთებას 5-რაუნდიან დაპირისპირებაში, ამაზე პასუხი ჯერ არავინ იცის. კითხვის ნიშნებს იწვევს მისი დაცვა დგომში. სტრაიკინგის ფაზაში ბრაზილიელი სერიოზული პრობლემების წინაშე ჯერ არ მდგარა, მაგრამ შესამჩნევია, რომ მისი მეტოქეები დარტყმების გატარებას საკმაოდ მარტივად ახერხებენ. ძალიან კარგი და ამტანი ყბა ბორალიოს მნიშვნელოვან დახმარებას უწევს.
გამოცდილება: 5-რაუნდიანი ბრძოლის გამოცდილება UFC-ში ძალიან ბევრს ნიშნავს, განსაკუთრებით მაშინ, როდესაც შენს მეტოქეს ბოლო ხუთი დუელიდან ოთხი სწორედ 25-წუთიანი ჰქონდა - შესაბამისად, მისი მოსამზადებელი პროცესი უკვე დიდი ხანია, რაც მარათონული დაპირისპირებისთვის სათანადო კონდიციებში შესვლას ემსახურება. როგორც უკვე ვთქვით, ბორალიოს ბრძოლების მესამე რაუნდში ტემპის გაძლება უჭირს. ამასთანავე, კანონიერს აქვს დარტყმის ის ძალა, რომლითაც ნებისმიერი მეტოქის დაზიანება შეუძლია, ათლეტურობის გამო კი მისი წაქცევა და გაკონტროლება ძალიან რთულია.
UFC Vegas 96-ზე ექსპერტები ბორალიოს დიდ ფავორიტად მიიჩნევენ, რაც ჩემთვის ცოტათი გასაკვირია. ცხადია, კანონიერი საუკეთესო ფორმაში აღარ არის, ბორალიო კი უნიჭიერესი ტალანტია, მაგრამ, გამოცდილების კუთხით მებრძოლებს შორის ძალიან დიდი სხვაობაა. თუ ბორალიო ფრთხილ საბრძოლო ტაქტიკას აირჩევს, ვფიქრობ, მას ბრძოლის მოგების უკეთესი შანსი ექნება. იმ შემთხვევაში, თუ ბრაზილიელი ფონს გასვლას გრეპლინგით ეცდება, საქმის სწრაფად მომთავრების გარეშე წარმატების მიღწევა გაუჭირდება. შესაბამისად, ბორალიოსთვის გარედან ქულების აკრეფა და შესატევად სწორი მომენტის შერჩევა ბევრად მომგებიანი სტრატეგია ჩანს. შეძლებს ბორალიო 25 წუთის განმალობაში კანონიერის დისტანციაზე დატოვებას, ურთულესი ბარიერის გადალახვასა და დივიზიონის Top 5-ში შესვლას?! ამაზე პასუხს ძალიან მალე გავიგებთ.
ავტორი: საბა სოზაშვილი
