მერაბ დვალიშვილი პიოტრ იანთან ბრძოლაში ერთ კალენდარულ წელიწადში საჩემპიონო ქამრის დაცვას მეოთხედ ეცდება. გამარჯვების შემთხვევაში, ქართველი ჩემპიონი მსოფლიოს მთავარ პრომოუშენში უნიკალურ მიღწევას დააფიქსირებს. საინტერესოა, რომ ერთ წელში ქამრის 4-ჯერ დაცვა არ არის ერთადერთი რეკორდი, რომელსაც "მანქანა" უმიზნებს.
საუბარია კიდევ UFC-ში ზედიზედ გამარჯვებების რეკორდულ რაოდენობაზე. 34 წლის ჩემპიონის ანგარიშზე ამ დროისთვის არის ზედიზედ 14 მოგება და მას უსწრებს 3 მებრძოლი: ანდერსონ სილვა (16 მოგება), ისლამ მახაჩევი (16 მოგება) და კამარუ უსმანი (15 მოგება). როგორც ვხედავთ, დვალიშვილს ახალ რეკორდამდე ზედიზედ კიდევ 3 მოგება სჭირდება.
ნამდვილად რთული მისიაა, თუმცა ქართველი ჩემპიონის შესაძლებლობების მქონე მებრძოლისთვის არა შეუძლებელი. მას ახალ რეკორდში შეეცილება მხოლოდ დაღესტნელი ჩემპიონი, რომლის მოგებათა სერია აქტიური რჩება. ლეგენდარულმა ბრაზილიელმა ჩემპიონმა კარიერა დაასრულა დიდი ხნის წინ, ნიგერიელი მებრძოლის მოგებათა სერია კი 2022 წელს შეწყდა.
რჩებიან მხოლოდ ქვესაშუალო დივიზიონის ახალი რუსი ჩემპიონი და მერაბი. ვნახოთ, რომელი მათგანის სახელზე იქნება ახალი რეკორდი. აქვე დავამატებთ, ცოტა ხნის წინ, "მანქანამ" განაცხადა, რომ მომავალ წელს საჩემპიონო ქამარს ის ასევე 4-ჯერ დაიცავს.
