2025 წელი უახლოვდება თავის დასასრულს, UFC-კი წლის ყველა ივენთი ჩავლილია. შეგვიძლია შევაჯამოთ, თუ რით დაგვამახსოვრეს თავი ქართველმა მებრძოლებმა 2025 წლის იანვრიდან - დეკემბრის ჩათვლით.
მერაბ დვალიშვილის განაცხადი სუპერმსუბუქი დივიზიონის ყველა დროის საუკეთესოს წოდებაზე
დვალიშვილი 2025 წელს შეხვდა სუპერმსუბუქი დივიზიონის მოქმედი ჩემპიონის სტატუსით და ქამრის მოპოვებიდან ოთხ თვეში მან თავისი დომინანტობა განამტკიცა. ქართველმა ჩემპიონმა წელი გახსნა უმარ ნურმაგომედოვთან მოგებით, რის შემდეგაც ის პრაქტიკულად არ გაჩერებულა.
ივნისი - ქამრის დაცვა, ამჯერად შონ ო'მალისთან რემატჩში, თანაც საბმიშენით მესამე რაუნდში. ჩემპიონმა პაუზა აიღო სულ რაღაც ოთხი თვით, რის შემდეგაც თავისი დომინანტობა კორი სენდჰეგენთანაც განამტკიცა. რა ხდება შემდეგ? სრული სიგიჟე: მერაბი აცხადებს, რომ ქამრის დაცვა უნდა კიდევ ერთხელ, ჯამში მეოთხედ ერთ კალენდარულ წელში.
ამ მიღწევით "მანქანა" გახდებოდა ერთადერთი მებრძოლი UFC-ის ისტორიაში, ვინც ქამარი ერთ წელიწადში სამზე მეტჯერ დაიცვა. ამერიკელ მეტოქესთან მოგებიდან სულ რაღაც 2 თვეში 34 წლის ჩემპიონმა ჩანიშნა რემატჩი პიოტრ იანთან, მაგრამ რეკორდი ვერ დამყარდა: წაგება მსაჯთა ერთსულოვანი გადაწყვეტილებით რუს ოპონენტთან.
დიახ, დვალიშვილი 2025 წელს ასრულებს სუპერმსუბუქი დივიზიონის ყოფილი ჩემპიონის რანგში, თუმცა ის შედეგები, რაც მან დააფიქსირა ერთ კალენდარულ წელში, სიგიჟედ რჩება. თავად განსაჯეთ, რეკორდი, რომელიც ცდება 61 კილოგრამ წონით დივიზიონს და მოიცავს მთელ პრომოუშენს: ყველაზე მეტი თეიქდაუნი - 119.
ამის გარდა, მიღწევები კონკრეტულად სუპერმსუბუქ დივიზიონში - ყველაზე მეტი გამარჯვება მსაჯთა ერთსულოვანი გადაწყვეტილებით (11), ყველაზე გრძელი მოგებათა სერია 61 კილოგრამში (13), ყველაზე მეტი დრო კონტროლში (1:38:10), ყველაზე მეტი დარტყმა (2672) და რა თქმა უნდა, ყველაზე მეტი თეიქდაუნიც (106).
ქამრის ოთხჯერ დაცვა ვერ შედგა, თუმცა ამის გაკეთება სამჯერ, ასევე ისტორიული შედეგია. ქართველი ყოფილი ჩემპიონი გაუტოლდა ისეთ ლეგენდებს, როგორებიც არიან ტიტო ორტისი, მეტ ჰიუზი, ჩაკ ლიდელი, დემეტრიუს ჯონსონი, კამარუ უსმანი და ალექს პერეირა. ველოდებით მერაბის ტრიუმფალურ დაბრუნებას 2026-ში.
ორი დივიზიონის ქართველი ჩემპიონი
დვალიშვილის მსგავსად, 2025 წელს ჩემპიონობით ილია თოფურიაც შეხვდა. ქამრის მოპოვება და შენარჩუნება მან მოასწრო ჯერ კიდევ 2024 წელს, ალექს ვოლკანოვსკისა და მაქს ჰოლოუეისთან მოგებით. იყო საუბრები, თითქოს ქართველი მებრძოლი ვეტერან ექს-ჩემპიონს მისცემდა მეორე შანსს, მაგრამ ახალ დომინანტს სხვა გეგმები ჰქონდა.
"ელ მატადორმა" დათმო ქვემსუბუქი დივიზიონის ქამარი და გადაინაცვლა მსუბუქში, სადაც ისლამ მახაჩევთან ბრძოლა დაისახა მიზნად. დაღესტნელ მებრძოლთან ჩხუბი არ შედგა, რადგან ის ავიდა 77 კილოგრამში, 28 წლის ჩემპიონს კი სატიტულო დუელი ჩარლზ ოლივეირასთან ერგო.
თოფურიამ ბრაზილიელი მოწინააღმდეგე დაანოკაუტა 2 წუთსა და 27 წამში, რის შედეგადაც ქვემსუბუქი დივიზიონის ჩემპიონობა იზეიმა. ქართველი ჩემპიონი გახდა რიგით მე-10 მებრძოლი 2 დივიზიონის ქამრით პრომოუშენის ისტორიაში, რენდი კუტიურის, ჟორჟ სენ-პიერის, ბიჯეი პენის, დანიელ კორმიეს, კონორ მაკგრეგორის, ჰენრი სეხუდოს, ჯონ ჯონსის, ალექს პერეირასა და ამანდა ნუნესის შემდეგ.
ცოტა ხნის წინ, ამ სიას ქვესაშუალო დივიზიონის კავკასიელი ჩემპიონიც შეემატა. ილია 2025 წელს ასრულებს მსუბუქი დივიზიონის ჩემპიონის სტატუსით, მომავალი წლისთვის კი მის გეგმებშია პირად ცხოვრებაში არსებული პრობლემების მოგვარება, ასევე ჯასტინ გეიჯისა და პედი პიმბლეტს შორის მოგებულთან ჩხუბი.
ახალი სახე, ნაცნობი გვარით
2025 წელს UFC-ში ნამდვილი დამპყრობელივით შემოიჭრა ალექსანდრე თოფურია, რომელმაც წელიწადი ორი გამარჯვებით დაასრულა. პრომოუშენში სადებიუტო ჩხუბში ქართველმა მებრძოლმა მოუგო კოლბი თიქნესს, მოგვიანებით კი ბეკზატ ალმახანს. ორივე დუელში "კონკისტადორი" აბსოლუტური დომიმანტი იყო.
29 წლის მებრძოლი გახდა UFC-ის ჩემპიონი ილიას მწვრთნელის რანგში, სამომავლოდ კი მის გეგმებშია ქამრის დაუფლება უკვე მებრძოლის სტატუსით. ვნახოთ, რა იქნება 2026-ში, წელს კი ფაქტია, ალექსანდრე პრომოუშენის ერთ-ერთი ყველაზე საინტერესო და იმედისმომცემი ახალწვეულია.
"ნინძას" დაბრუნება, რომელიც არ შედგა
UFC-ის უკანასკნელი ივენთი დააგვირგვინა გიგა ჭიკაძემ, რომლის მოწინააღმდეგე პერსპექტიული კევინ ვალეხოსი იყო. სამწუხაროდ, ქართველმა მებრძოლმა წააგო და წელი დაასრულა მოგების გარეშე, არგენტინელ მეტოქემდე, მის გზაზე იყო წარუმატებლობა დევიდ ონამასთან.
ამ ყველაფრის შედეგად, "ნინძა" ქვემსუბუქი დივიზიონის ტოპ 15-დან ამოვარდა. გამოსარჩევია ისიც, რომ "ელ ჩინოსთან" ბრძოლამდე 37 წლის სტრაიკერმა დააანონსა საბრძოლო აკადემიის გახსნა, სადაც ბავშვებს შეეძლებათ კარატეს, კიკბოქსინგისა და შერეული საბრძოლო ხელოვნებების განხრით ვარჯიში.
რომან დოლიძის რევანში მარვინ ვეტორისთან
დოლიძემ წელიწადი დაასრულა ერთი გამარჯვებითა და ერთი მარცხით, მოგება გამოდგა ნამდვილად განსაკუთრებული, მოწინააღმდეგესთან, რომელთანაც წაგება წარსულში ძალიან საკამათო მოვლენა გამოდგა. საუბარია 2023 წლის მარტში გამართულ ვეტორისთან ჩხუბზე, რომელშიც ბევრის აზრით, ქართველი მებრძოლი მარცხს არ იმსახურებდა.
რომანმა წარმატებით აიღო რევანში იტალიელ მოწინააღმდეგეზე, თუმცა სამწუხაროდ, ამ ბრძოლიდან ხუთ თვეში მან ენტონი ერნანდესთან წააგო. მარცხის მიუხედავად, "კავკასიელი" ინარჩუნებს პოზიციას 84 კილოგრამ წონითი დივიზიონის ტოპ 15-ში. 2025 წელს ის მე-12 ადგილზე ასრულებს.
ქართველი, რომელმაც UFC დატოვა
2025 წლის დასაწყისში UFC-ის წევრი იყო გურამ ქუთათელაძეც, რომელსაც მარტში კაუე ფერნანდესთან ჰქონდა ბრძოლა. ის დამარცხდა, პრომოუშენმა კი ქართველ მებრძოლთან თანამშრომლობა აღარ გააგრძელა. მისი მონაგარი შეადგენდა 2 მოგებასა და 4 წაგებას, გამოსარჩევია ისიც, რომ ტრავმების გამო, "ვიკინგს" რამდენიმე ჩხუბი ჩაეშალა.
UFC-ის შემდეგ, 33 წლის მებრძოლმა გადაინაცვლა ACA-ში, სადაც ტექნიკური ნოკაუტით ვიქტორ ჰიუგო დაამარცხა. ვნახოთ, შეძლებს თუ არა ქუთათელაძე კარიერის რეანიმირებას სრულფასოვნად. მართალია, მან დატოვა მსოფლიოს მთავარი პრომოუშენი, მაგრამ იქ მებრძოლი თანამემამულეების გვერდით, ქართველი სპორტსმენი ყოველთვის არის.
