UFC-ის მსუბუქი წონითი დივიზიონის ჩემპიონი, ილია თოფურია ესტუმრა ადინ როსს, ვისთანაც ლაივსტრიმზე არაერთ საინტერესო საკითხზე ისაუბრა. საუბარი შეეხო თეთრ სახლში დაგეგმილ ღონისძიებას, ასევე ისლამ მახაჩევსა და არმან ცარუკიანთან შესაძლო ჩხუბებს. ქართველ მებრძოლთან ინტერვიუს დროს ყურადღებიც ცენტრში ჯეიკ პოლიც მოექცა.
წელიწადში 3-4 ბრძოლის ჩატარება მერაბ დვალიშვილის სტილში
"ყველას თავისი სტილი და ხედვა აქვს. თუ მერაბს წელიწადში სამი - ოთხი ბრძოლის ჩატარება ანიჭებს სიამოვნებას, მან ეს უნდა გააკეთოს. პირადად მე, აღნიშნული იდეა არ მხიბლავს. მირჩევნია ერთი სრულფასოვანი კემპის გავლა. ოქტაგონზე არც ტრავმირებული გამოვალ, 100%-ით მზად უნდა ვიყო".
ჯასტინ გეიჯისთან სატიტულო ბრძოლა
"ჩემი შემდეგი მეტოქე? ვფიქრობ, გეიჯი იქნება. ვუყურე მისი და პიმბლეტის ბრძოლას - ეს იყო საშინელება. ორივე ძალიან ცუდად გამოიყურებოდა. დაბალი ხარისხის ჩხუბი იყო".
ისლამ მახაჩევთან ბრძოლის შესაძლებლობა
"ჩემთვის იდეალური სცენარი იქნებოდა მახაჩევთან ბრძოლა ქვესაშუალო წონით დივიზიონში, რადგან ასე შევძლებდი მესამე ქამრის მოპოვებას. ჩემთვის კიდევ უკეთესი სცენარი იქნებოდა ჩხუბი 155-170 ფუნტს შორის და ახალი ქამრის შექმნა. რატომ არ დავარქვათ მას P4P ტიტული? ის ნომერი პირველია, მე კი ამჟამად მე-2 ვარ.
ჩემთვის, პირადად, მე პირველი ვარ. როდესაც მსოფლიოს ორ საუკეთესო მებრძოლს აყენებ ერთმანეთის პირისპირ და მათ შორის დებ Pound-For-Pound ქამარს, ვინც მოიგებს, ის არის საუკეთესო".
არმან ცარუკიანთან ბრძოლის ვარიანტი
"ცარუკიანი ჩემი ყველაზე რთული გამოწვევაა? არანაირად, ყველაზე რთული გამოწვევები უკვე მქონდა. არ მიყვარს იმის თქმა, თუ ვისთან იჩხუბა, რადგან ამ პრომოუშენში იოლი ბრძოლა არ არსებობს. ყველა მოწინააღმდეგე ძალიან ძლიერია. სწორედ ეს არის მიზეზი, რატომაც ჩხუბობენ მსოფლიოს ყველაზე დიდ ორგანიზაციაში.
თუმცა, არმანი დამარცხდა მახაჩევთან, ასევე გამროტთან. კარიერის დასაწყისში ნოკაუტითაც გათიშეს და რეალურად მას არ აქვს ბრძოლის დასრულების უნარი. ის აფინიშებს მხოლოდ მაშინ, როცა მოწინააღმდეგე იღლება; შემდეგ გადაჰყავს ის მიწაზე და აკეთებს Ground & Pound-ის მსგავს მოქმედებებს.
თუ შეხვდება ადამიანს, რომელსაც ნამდვილად აქვს სათანადო მომზადება, აქვს გამძლეობა, არ ეშინია იატაკზე ბრძოლის, მაშინ სომეხ მებრძოლს ძალიან გაუჭირდება. თუ დამირეკავენ და მეტყვიან, რომ მასთან უნდა ვიჩხუბო...არანაირი პრობლემა, იმდენ ძლიერ მოწინააღმდეგესთან მიბრძოლია.
გგონიათ, ცარუკიანთან დაპირისპირება მადარდებს? საერთოდ არ მაინტერესებს. თუ ამ ბრძოლას მომცემენ, ვიბრძოლებ. პრობლემა არ არის. გეიჯი, არმანი...არ მაინტერესებს, ორივე ერთადაც, ერთ საღამოს".
თეთრი სახლის ივენთი
"ამ მომენტისთვის საერთოდ არ მაქვს წარმოდგენა, რა ხდება.ვიცი, რომ ზაფხულში ვიბრძოლებ, თუმცა კონკრეტული თარიღი ან ადგილი არ მაქვს, მაგრამ ვიცი, რომ ჩემი ჩხუბი შედგება. მზად ვარ".
როგორც აღვნიშნეთ, საუბარი შეეხო პოლსაც, ვისზეც თოფურიამ განაცხადა, რომ ის არის მასხარა და ძალიან ცუდი მოკრივე. მოგვიანებით, ინტერვიუს შეუერთდა თავად ამერიკელი შოუმენიც, რომელმაც ქართველ ჩემპიონს სპარინგი შესთავაზა.
პოლი: "მოდი, ვისპარინგოთ. როდესაც სპარინგში საჯდომს აგიწითლებ, მერე რას მეტყვი?".
თოფურია: "ყბა რომ მოგირჩება, მერე ვისპარინგოთ. უბრალოდ წინასწარ მოემზადე ყბის კიდევ ერთხელ მოტეხვისთვის".
პოლი: "პატარა ბიჭი ხარ, სულ რაღაც 167 სანტიმეტრი".
თოფურია: "შეიძლება ამ ოთახში ყველაზე პატარა ვარ, თუმცა ისეთს დაგარტყამ, რომ ჩემი კვერცხების სიმაღლეზე დაგაყენებ. ჩემს წინ მუხლებზე იდგები. პატივს გცემ, ძმაო, შენ იცი, როგორ გაყიდო შენი ჩხუბები, მაგრამ სხვაობა ჩემსა და შენ შორის დიდია".
