რას უნდა ველოდოთ UFC 311-ზე: წლის პირველი PPV ივენთის პრევიუ

 მერაბის გარდა სატიტულო ჯახი ისლამ მახაჩევსა და არმან ცარუკიანს ექნებათ. არმანი ახალქალაქში დაბადებული მებრძოლია, რომელიც 3 წლის განმავლობაში საქართველოში ცხოვრობდა, შემდეგ კი მისი ოჯახი რუსეთში გადავიდა. ამ ეტაპზე იგი ხან საქართველოს ხან რუსეთს, ხან კი სომხეთს წარმოადგენს, მაგრამ ცხადია, რომ იგი სომხეთის სიამაყეა და ყველაზე მეტი გულშემატკივარიც სწორედ იქ ჰყავს. არმანმა ისლამ მახაჩევთან უკვე გამართა ორთაბრძოლა - 2019 წელს, სადაც არმანი UFC-ში დებიუტანტი იყო და დამარცხდა, თუმცა იმის თქმაც შეიძლება, რომ ცარუკიანმა მახაჩევს კარიერის ერთ-ერთი ყველაზე ძლიერი წინააღმდეგობა შესთავაზა. მახაჩევმა ვერ მოახერხა ახალბედა ახალქალაქელის დომინანტურად დამარცხება, თუმცა მაინც იპოვა გზა, რომ საკმარისი ქულები მოეპოვებინა. 

 6 წლის შემდეგ ორივე ათლეტმა სერიოზული პროგრესი განიცადა. მათი შეხვედრის შემდგომ მახაჩევს ბრძოლა არ დაუთმია. მეტიც, ის აქტიური ჩემპიონებიდან ყველაზე გრძელი მოგებების სერიის მქონე ჩემპიონია და P4P რეიტინგის ლიდერია. საუბარი იმაზეც კი მიდის, რომ იგი ხაბიბ ნურმაგომედოვზე - მის მენტორსა და მწვრთნელზე დიდი ჩემპიონია.

 დებიუტის შემდეგ არმანმა მხოლოდ ერთი ბრძოლა დათმო - მატეუშ გამროტთან, უმაღლესი დონის გრეპლერთან, რომელთანაც საკმაოდ ახლო ბრძოლა გამართა და ბევრის აზრით მოიგო კიდეც, მაგრამ, საბოლოოდ, მსაჯებმა გამარჯვება პოლონელს მიანიჭებს. ამჯერად სომეხი მებრძოლი 4-მოგებიან სერიაზეა და ამ ოთხი გამარჯვებიდან გამორჩეულია პერფორმანსები დამირ ისმაგულოვთან, ბენილ დარიუშთან და ყოფილ ჩემპიონ ჩარლზ ოლივეირასთან. შეიძლება დამირი TOP კონტენდერი არ არის, მაგრამ კარგი მოჭიდავეა, კრივის კარგი უნარებიც აქვს და მისი დამარცხება არმანის რეზიუმეს უფრო ღირებულს ხდის. არმანმა Lightweight დივიზიონის ერთ-ერთი ძლიერი მებრძოლი ბენილ დარიუში მალევე - 1 წუთსა და 4 წამში დაანოკაუტა. სამწუხაროდ, გრეპლინგის გაცვლები, მაგრამ ამ ბრძოლაში ცარუკიანმა დაამტკიცა, რომ მძიმე დარტყმებიც აქვს და კარგი ტექნიკაც.

 
 ჩარლზ ოლივეირასთან დაპირისპირებაში კი ბევრი რამ გამოჩნდა. პირველ რიგში ის, რომ სომეხ მებრძოლს ჩემპიონის გული და ხასიათი აქვს, იშვიათი, გამორჩეული თვისებაა. ასევე გამოჩნდა, რომ ჯიუ ჯიცუს ლეტალური ილეთებისგან თავის დაცვა იცის. მიუხედავად იმისა, რომ UFC-ის ისტორიაში ერთ-ერთ საუკეთესო ჯიცერი არმანს მახრჩობელა და მტკივნეული ილეთებით რამდენჯერმე სერიოზულად დაემუქრა, ცარუკიანმა გამოსავალი ყოველ ჯერზე იპოვა. თუმცა, დადებით ასპექტებთან ერთად ისეთი რაღაცებიც გამოჩნდა, რაც მისგან მეტი ყურადღების დათმობას მოითხოვს. ვთქვით, რომ ცარუკიანმა ოლივეირას შეტევებს გაუძლო, მაგრამ ეს იმას ნიშნავს, რომ არმანმა ჩარლზის შეტევებისთვის სივრცე და დრო დატოვა. ისლამ მახაჩევთან მსგავსი შეცდომების დაშვება მას ბევრად ძვირად უნდა დაუჯდეს. ტექნიკისა და არანორმალური ძალის ხარჯზე შესაძლოა ისლამმა არმანის რომელიმე კიდური საერთოდ სახლში წაიღოს.

 დგომში ორივე განვითარდა, მაგრამ მე ცარუკიანის სტრაიკინგი უფრო მომწონს. თუ დააკვირდებით, არმანს ბევრად სუფთა დგომი აქვს და წმინდა მუაი ტაის დარტყმებს ბევრად გამართულად ხმარობს. ახალქალაქელი ძალიან ძლიერი და ელასტიური ათლეტია, ამის ხარჯზე ხელით დაწყებულ კომბინაციებს ფეხის დარტყმებით ძალიან კარგად ამთავრებს.

 უშუალოდ დგომის ჭიდაობაში მებრძოლების შანსებს 50/50-ზე შევაფასებდი. თუ ისლამ მახაჩევის ჭიდაობის წინააღმდეგ თავის დასაცავად მეტ-ნაკლებად ეფექტური პასუხი დასტინ პორიემ მოიფიქრა, მგონია, რომ ამას არმანიც მოახერხებს, მაგრამ მახაჩევი და ხაბიბი ის მებრძოლები არიან, რომლებიც მუდმივად ვითარდებიან და უბრალოდ კი არ ჭიდაობენ, არამედ კალკულირებულად. მათი საბრძოლო სტრატეგია სკრუპულოზურად იგეგმება ხოლმე. დარწმუნებული ვარ, არმანის ძალებს ისინი სწორად და ადეკვატურად აფასებენ, მისი წინააღმდეგობის ხარისხი მათ ზედმიწევნით ექნებათ შესწავლილი.

 უშუალოდ პარტერში მახაჩევისკენ უნდა გადავიხარო. პორიესთან მე-5 რაუნდში დაღლილმა და საკმაოდ დაზიანებმულმაც მოახერხა და საბმიშენი იპოვა. დამიჯერეთ, თუ მებრძოლი გადახსნილი შუბლით მახრჩობელა ილეთს მეხუთე რაუნდში აკეთებს, ეს იმას ნიშნავს, რომ მისი გრეპლინგი უმაღლესი დონისაა.

 
 საბოლოოდ მე მაინც მახაჩევის გამარჯვება ვვარაუდობ, მაგრამ ცარუკიანის ტრიუმფი, თუნდაც წმინდა სტრაიკინგისგან დანოკაუტებული მახაჩევის ხილვა ნამდვილად არ გამაკვირვებს.

ჟირი პროჰასკა VS. ჯამალ ჰილი

 UFC 311-ზე ერთმანეთის წინააღმდეგ Light Heavyweight-ის ორი ყოფილი ჩემპიონი - ჟირი პროჰასკა და ჯამალ ჰილი წარდგებიან, რომლებიც ალექს პერეირასთან კიდევ ერთ ბრძოლის უფლების მოპოვებას შეეცდებიან. როგორც იცით, ბრაზილიელთან პროჰასკა უკვე ორჯერ დამარცხდა - ჰილი კი ერთხელ. აქ ამ მებრძოლების უნარების შედარება ბევრს არაფერს მოგვცემს, რადგან მარცხების შემდეგ ორივე მებრძოლი ფსიქოლოგიურად ძალიან ცუდად იყო. ვინ როგორ აღიდგინა მენტალური მდგომარეობა - ამ ბრძოლაში ეს შეიძლება გადამწყვეტი ფაქტორი გამოდგეს.

 პროჰასკას უფრო მეტის გადატანა მოუწია. მან წონის შეცვლაც იფიქრა, რაც ცხადყოფს იმას, რომ საკუთარ თავსა და შესაძლებლობებში ეჭვი ეპარება. შესაძლოა ქვემძიმე წონით კატეგორიაში ჩეხი საკუთარ თავს ვეღარ ხედავდეს. 

 ჯამალ ჰილმა „პოატანთან" ბრძოლაზე საუბარი ვერ დაასრულა. ეს მარცხი მან არასპორტულად და ცუდად მიიღო, რომ მისკენ გადახრა მიჭირს. ბევრი მებრძოლი მინახავს, რომელმაც ასე ცუდად მიიღო წაგება რემატჩზე ჩაიციკლა და წინ ვერ წაიწია, საბოლოოდ კი ყველაფერი ცუდად დაუმთავრდათ. ამ შემთხვევაში მე მაინც პროჰასკასკენ ვიხრები, რადგან პროჰასკას ისეთი სტრაიკინგი აქვს, რთულია მისთვის მოემზადო. ჰილს ძალიან კარგი დგომი აქვს, მაგრამ მგონია, რომ როდესაც სიტუაცია ქაოტური გახდება და დარტყმები გაცვლა ატომურ ომს დაემსგავსება ჰილს პროჰასკასთან შანსი არ ექნება. ასეთ ქაოსში იღბალმა შეიძლება ნებისმიერი მხარე აირჩიოს, მაგრამ ცხადია - ყველაზე მეტად ეს პროჰასკას თამაშია.

 რამდენიმე წლის წინ დარიუში-მოიკანოს დაპირისპირებაზე განსხვავებული მოსაზრება და პროგნოზი მექნებოდა, მაგრამ ახლა საერთოდ სხვა აზრზე ვარ. ბენილ დარიუშს აშკარა რეგრესი აქვს, ბოლო ორ ბრძოლაში ნოკაუტით დამარცხდა - ოლივეირასთან და ცარუკიანთან. ირანული წარმოშობის ამერიკელს წონის კლებაც უჭირს, რის გამოც ამტანობა დაუსუსტდა. ოლივეირასთან მარცხის შემდეგ გიგამ თქვა, რომ დარიუშს ცუდი წონის კლება ჰქონდა და ყველა მომდევნო აწონვაზე ცალსახაა, რომ შესაბამის ნიშნულამდე ჩამოსვლა უფრო და უფრო რთულდება. მგონია, რომ დარიუშს მცირე კარგ დარტყმაზეც ცუდი რეაქცია ექნება. მით უფრო მოიკანოს კრივის გათვალისწინებით. რენატომ, რომელიც კარიერული აღმავლობის გზაზეა ბენუა სენ-დენის დომინაციით გადაუარა, მიწაზეც დაჩაგრა და ფეხზე ისე დააზიანა, რომ ექიმს ბრძოლის გაჩერება აიძულა. 

დარიუშს ასაკიც დაეწია და მისი საუკეთესო ფორმა წარსულში დარჩა, თუმცა ეს გრეპლინგზე ნაკლებად აისახება. უშუალოდ პარტერში მოიკანოს გამოკვეთილ უპირატესობას არ მივცემ, რაგან დარიუშის გრეპლინგი ყოვლად დაუფასებელი და უმაგრესია. ერთი სიტყვით, მოიკანოსკენ ვიხრები, მგონია, რომ დარიუში ბრძოლას მიწაზე ვერ გადაიყვანს.

 კევინ ჰოლანდი ყველამ ვიცით. უმაგრესი სტრაიკერი, რომელსაც ჭიდაობაში პრობლემები აქვს. რეინერ დე რიდერი კი ONE Championship-ის ორი დივიზიონის ყოფილი ჩემპიონია, რომელიც გრეპლინგის ოსტატია, თუმცა დგომში ასეთი სუსტი მებრძოლი არასდროს არ მინახავს. აქ გემოვნების ამბავია, ვის მოჭიდავე ურჩევნია - ვის სტრაიკერი, მაგრამ ფაქტები რომ შევაჯამოთ - აქ დაპირისპირება მოჭიდავესა და სტრაიკერს შორის კი არა, გრეპლერსა და სტრაიკერს შორისაა. დგომში ჰოლანდი დე რიდერს უბრალოდ დაშლის. რაც შეეხება ჭიდაობას, კი, ჰოლანდი ცუდი მოჭიდავეა, მაგრამ უშუალოდ გადაყვანებში არც ჰოლანდიელია მთლად ხაბიბ ნურამგომედოვი. 

 ერთადერთი, რაც მაფიქირებს, წონითი კატეგორიაა. საშუალო წონისთვის ჰოლანდი პატარა და სუსტია, დე რიდერი კი დიდი და ძლიერი. მაგრამ მაინც, დე რიდერმა UFC-ის დებიუტში ჯერალდ მერშარტი ისეთ წვალებით დაამარცხა, რომ TOP 15-ში მის ადგილს ვერ ვხედავ. ამ დაპირისპირებაში ჩემი არჩევანი კევინ ჰოლანდია.

PRELIM CARD:

პრელიმი ქარდის უკანასკნელი ჯახი ძალიან საინტერესო იქნება. ბრძოლა პეიტონ ტალბოტსა და რაონი ბარსელოს შორის - Bantamweight-ში. ბარსელოსი მაგარი ბიჭია, ერთ დროს მერაბთან უნდა ებრძოლა. სწორედ მაშინ შევისწავლე ეს ათლეტი, მაგრამ პირდაპირ ვიტყვი, რომ ის დაბერდა. საპირისპიროდ - ტალბოტი დაუმარცხებელი ამომავალი ვარსკვლავია, უნიჭერესი მებრძოლი. მოკლედ ვიტყვი, ვფიქრობ, რომ ტალბოტი ბარსელოსს დააფინიშებს.

ჟაილტონ ალმეიდა VS. სერგეი სპივაკი

 ორი დიდი ბიჭი უმაგრესი ჭიდაობის უნარ-ჩვევებით. მიუხედავად იმისა, რომ სერგეი სპივაკს მაგარი სამბო აქვს და მიწაზეც შეუძლია პრობლემების შექმნა, მაინც ჟაილტონ ალმეიდასკენ უნდა გადავიხარო. ალმეიდას მხოლოდ ერთი წაგება, აქვს ისიც კურტის ბლეიდსთან, რომელიც ოდნავ უფრო მაღალი საბრძოლო IQ-თი საჩემპიონო მებრძოლი იქნებოდა. ალმეიდას მინუსად ვერ ჩავუთვლი იმას, რომ კურტის მიწაზე ვერ გადაუარა. მგონია, რომ სპივაკს მიწაზე გადაიყვანს და TKO-თი მოუგებს. საბმიშენს ვერ ვხედავ, რადგან სპივაკი სამბოში ძალიან გაწაფულია. სპივაკის არ დაფასება არ ღირს, კარგ სერიაზე და მაგარ ფორმაშია, მაგრამ, მგონია, რომ ალმეიდა უბრალოდ უმაგრესია.

მოგდან გუსკოვი VS. ბილი ელეკანა

მოკლედ და კონკრეტულად - ბოგდან გუსკოვი. უზბეკ მებრძოლს ჯონი უოკერთან უნდა ებრძოლა, ბრაზილიელი შეხვედრას ჩაეხსნა. საპასუხოდ UFC-მა ბილი ელაკანა იპოვა. ელეკანა ამერიკელი მებრძოლია, რომელსაც არც გამოცდილება აქვს და არც სასწაული უნარები. მგონია, რომ გუსკოვი გამოცდილების ხარჯზე დებიუტანტს მარტივად მოუგებს.

გრანტ დოუსონი VS. დიეგო ფერეირა

 გრანტ დოუსონისა და დიეგო ფერეირას დაპირისპირება ძალიან სანახაობრივი უნდა გამოვიდეს, ამ ბრძოლის პრელიმზე ჩანიშვნა საცოდაობაა, მაგრამ რას ვიზამთ. დოუსონი Lightweight დივიზიონის ერთ-ერთი ჩუმი რაინდია, რომელიც ძალიან მალე ელიტაშიც შეაღწევს. გრანტს მხოლოდ  ერთი წაგება აქვს - ისიც ბობი გრინთან, საწყის წამებში სანოკაუტე დარტყმის გაშვებით. დოუსონი არის ბიჭი, რომელმაც დამირ ისმაგილოვი ოქტაგონიდან გააქრო, ოლიმპიური მოჭიდავე მარკ მედსენი კი მესამე რაუნდში მახრჩობელათი დაამარცხა. 

 ფერეირა დოუსონითვის უმაგრესი მეტოქეა, მაგრამ, ვფიქრობ, რომ ფერეირას დროც წასულია, მიუხედავად იმისა, რომ მოგებების სერიაზეა. ამ ბრძოლაში დოუსონს აშკარა ფავორიტად დავასახელებდი. მეტიც, არმან ცარუკიანის პირისპირ მას დიდ შანსებს მივცემდი. დარწმუნებული ვარ, ამაზე საუბარი მომავალში აუცილებლად მოგვიწევს.

 UFC 311-ის პრევიუს ამ ბრძოლით დავასრულებ, რადგან ტაგირი უმარისა და მახაჩევის კემპშია. დაღესტანელი უმსუბუქესწონოსანი ძალიან ძლიერი მებრძოლია, რომელიც ამ დივიზიონისთვის ფიზიკურად ძალიან დიდი და ძლიერია. მისი მეტოქე ამერიკელი დაუმარცხებელი ათლეტი კლეიტონ კარპენტერი იქნება. კლეიტონს რვა მოგებიდან ოთხი მტკივნეულ მახრჩობელათი აქვს მოპოვებული. LFA-ში მისი რეკორდი 3-0-ზეა, ხოლო UFC-ში 2-0-ზე. მას ბრძოლა Dana White's Contender Series-შიც აქვს მოგებული. გამოდის, რომ რვა მოგებიდან ექვსი ელიტარული მოწინააღმდეგესთან აქვს მოპოვებული. მაქამდეც აქვს სამოყვარულო ჯახების გამოცდილება - სამოყვარულო MMA-ში Iron Boy MMA-ის ქამარიც მოიგო - 2018 წელს. 

 როგორც ვთქვით, ტაგირ ულანბეკოვი დაღესტანელი და ხაბიბის გუნდის წევრია. ალბათ, ეს მასზე უკვე ბევრს ამბობს. MMA-ში რეკორდი 15-2-ზე აქვს. UFC-ში ხუთი ბრძოლიდან ოთხი მოგება აქვს, იქამდე კი წარმატებით გამოდიოდა Fight Nights Global-ში, სადაც ჩემპიონიც გახდა. 

 ძალიან კარგი ბრძოლა იქნება, უპირატესობას კი დაღესტნელს მივანიჭებ. ტაგირს ისეთ კემპი აქვს გავლილი, მგონია, რომ უმაგრესს ფორმაშია და ამერიკელს აჯობებს.