29 ნოემბერს, 20:00 საათზე სპორტის სასახლეში RKENA-ს პირველი ივენთი გაიმართება. აღნიშნულ ღონისძიებაზე შედგება მერაბ შარიქაძის დებიუტი MMA-ს მებრძოლის რანგში. განვიხილოთ, თუ რას უნდა ველოდოთ მოახლოებული ჩხუბებისგან.
მებრძოლები, რომლებიც პრელიმში გამოვლენ
ივენთი გაიხსნება ქალბატონების ბრძოლით - ნინი ცქვიტარია ელზა სერესოს დაუპირისპირდება. შემდეგი ბრძოლა - რამაზ ივანიაძე რამონ დრუმის წინააღმდეგ. ქართველ კიკბოქსერს აქვს დებიუტი MMA-ში, მისი ბრაზილიელი მეტოქის ანგარიშზე კი 1 მოგება და 2 წაგება არის.
პრელიმში იბრძოლებს საბა სოზაშვილიც, რომლის მოწინააღმდეგე მარსინ ზაიაცი იქნება. აღსანიშნავია ისიც, რომ აწონვების ცერემონიალზე დაფიქსირდა სამწუხარო ფაქტი: ქართველი მებრძოლი გადაცდა წონის დაშვებულ ლიმიტს და 67.8 კილოგრამი დააფიქსირა. მისი პოლონელი მეტოქე კი ლიმიტში ჩაეტია.
ამის მიუხედავად, ბრძოლა მაინც შედგება. პრელიმის უკანასკნელ ბრძოლაში ჯანსუ გოგია ჯალოლიდინ იულდაშევს დაუპირისპირდება. ქართველი მებრძოლის ანგარიშზეა 3 მოგება და 1 წაგება, მისმა უზბეკმა მეტოქემ ასევე იმარჯვა 3 ჩხუბში, მაგრამ 2-ჯერაც დამარცხდა.
მთავარი ქარდი
მთავარი ქარდი ჯუბა ბერიძისა და იაროსლავ ჩოკობოკის ბრძოლით გაიხსნება. მასპინძელმა მებრძოლმა მოასწრო ოთხი გამარჯვების მოპოვება და ერთი წაგების დაფიქსირება. ცნობისთვის, ქართველი მებრძოლის 4 მოგებიდან 3, ფინიშით იყო. მის უკრაინელ მეტოქეს ზურგს 13-ჩხუბიანი გამოცდილება უმაგრებს.
24 წლის მებრძოლმა რვა შემთხვევაში მოიპოვა გამარჯვება, ხუთჯერ კი დამარცხდა. შემდეგი ბრძოლა - გიორგი ფოლადიშვილი იერასილ თანირბერგენოვის წინააღმდეგ. საინტერესოა, რომ ორივე მებრძოლი ღონისძიებას ხვდება წაუგებელი სერიით: ქართველმა მოიგო 3/3 ჩხუბი, მისმა ყაზახმა მეტოქემ კი 4/4.
მივადექით ფინალურ სამეულს, რომელსაც გახსნის ნიკოლოზ აბრამიშვილისა და ჰენრი ლინტულას ბრძოლა. გამოცდილი მებრძოლები, რომლებსაც 10 ჩხუბი დაუგროვდათ. ქართველმა მებრძოლმა მოიგო 7-ჯერ, წააგო 3-ჯერ, მისი ფინელი მეტოქის ანგარიშზე კი 11 გამარჯვება და 2 მარცხი არის.
ოქტაგონში გამოვა კიდევ ერთი დაუმარცხებელი მებრძოლი - დავით ლორთქიფანიძე, შვიდიდან შვიდი გამარჯვებით. სამწუხაროა ის, რომ ქართველმა მებრძოლმა ვერ შეძლო წონის დაშვებულ ლიმიტში ჩატევა და 71.1 კილოგრამი დააფიქსირა. რაც შეეხება მის მეტოქეს: ლეანდრო ბარბოსა.
ბრაზილიელ მოწინააღმდეგეს წონის ჩაბარებასთან დაკავშირებული პრობლემები არ ჰქონია. ვეტერანი მებრძოლის ანგარიშზე არის 22 ჩხუბი - 13 მოგება და 22 წაგება. ბოლოს კი ღონისძიების მთავარი მოვლენა: შარიქაძის დებიუტი MMA-ში. მისი ჩხუბი იქნება საჩვენებელი ფორმატის, რაც ნიშნავს იმას, რომ შედეგი პროფესიულ რეკორდში ქართველ მებრძოლს არ ჩაეწერება.
რაც შეეხება მერაბის მოწინააღმდეგეს - პატრიკ კონტნი, მებრძოლი ორი ჩხუბით თავის კარიერაში. ერთხელ მან იმარჯვა, ერთხელაც დამარცხდა. ასეთია RKENA-ს პირველი ღონისძიების ქარდი.
