მსუბუქი წონის ისტორიაში ერთ-ერთ ყველაზე მნიშვნელოვან ღონისძიებამდე სულ რაღაც 2 დღე დარჩა. მთავარ ივენთზე, ზემოხსენებული დივიზიონის ვაკანტური ტიტულისთვის, ერთმანეთს ილია თოფურია და ჩარლზ ოლივეირა დაუპირისპირდებიან. ძალზედ საინტერესო სატიტულო ბრძოლაა ასევე ჩანიშნული უმსუბუქესი დივიზიონის ჩემპიონს - ალექსანდრე პანტოჟასა და იმავე დივიზიონის კონტენდერს - კაი კარა ფრანსს შორის.
უკანასკნელად, ლას ვეგასსში, T-Mobile Arena-ზე წარიმართა UFC 317-ის პრესკონფერენცია, სადაც მებრძოლებმა ჟურნალისტთა მიერ დასმულ კითხვებს უპასუხეს.
კონფერენცია ილიასკენ მიმართული შეკითხვით დაიწყო, რომლის მთავარი თემაც "ელ მატადორის" "ცუდი ტიპის" როლი გახლავთ, რადგან მოგეხსენებათ, რომ ქართველი ჩემპიონი ფანთა ფავორიტი მებრძოლების დანოკაუტებითაა ცნობილი.
" თუ ლეგენდებს ერთმანეთზე მიყოლებით ამარცხებ, შენც ავტომატურად ლეგენდა ხდები.
სიმართლე რომ ვთქვა, ფანების მხრიდან ცუდ დამოკიდებულებას უკვე მიჩვეული ვარ, ერთადერთი რამ, რასაც ვიმედოვნებ ის არის, რომ შაბათ საღამოს ამ ბრძოლით დატკბობას შევძლებ. "
ასევე აღსანიშნავია ის ფაქტი, რომ ილიასთვის ეს ბრძოლა რიგით მე-9 იქნება, მოგების შემთხვევაში კი 2 წონითი კატეგორიის ჩემპიონი გახდება. მსგავს მოკლე პერიოდში, ასეთი სახის წარმატების მიღწევა კი მის ეფექტურობას მეტად ხაზს უსვამს.
"ოლივეირას დამარცხებით დავამტკიცებ, რომ მსოფლიოში საუკეთესო მებრძოლი ვარ. აქ საუბარი არაა იმაზე, ამ დაპირისპირებას მოვიგებ თუ არა - მე მას პირველივე რაუნდში გავთიშავ. გულშემატკივართა ცუდი რეაქცია მსგავს თემებზე ჩემთვის უკვე ბუნებრივია, მაგრამ ყველამ იცის თუ რა მოხდება ბრძოლის დროს."
პრესკონფერენციაზე გაღჟერდა საკითხი ილიას მომავალი მეტოქის თაობაზე, რაზეც ილიას დაზუსტებული პასუხი არ ჰქონდა. რაც შეეხება UFC-ის პრეზიდენტს, ამ შეკითხვას თავი მან შემდეგნაირად გაართვა:
"ილიას შემდეგი მეტოქის ვინაობა შაბათ საღამოს შემდეგ გადაწყდება."
ასევე ძალზედ საინტერესოა მსუბუქი დივიზიონის ყოფილი ჩემპიონის - ჩარლზ ოლივეირას დამოკიდებულება მისი ამჟამინდელი მეტოქის მიმართ.
"მე ილიას და მის განვლილ გზას დიდ პატივს ვცემ. ბრძოლისთვის მზად ვართ და გპირდებით, რომ შაბათ საღამოს შესანიშნავ სანახაობას გაჩუქებთ."
გარკვეული გარემოებების ცვლილების მიუხედავად, მოგეხსენებათ, რომ ისლამისა და ქართველი მატადორის დაპირისპირება გულშემატკივრებისა და ჟურნალისტებისთვის კვლავ აქტუალურ თემად რჩება. ამასთან დაკავშირებით, თოფურიამ საკუთარი ლაკონური აზრი დააფიქსირა.
"ჩვენ ისლამი საერთოდ არ გვაინტერესებს, ამიტომ შეგიძლია ეგ კითხვა შენთვის შეინახო"
