90-იანების დასაწყისი - დრო, როდესაც UFC დგამდა პირველ ნაბიჯებს, MMA-ს ცენტრი კი ორგანიზაცია Rings-ი იყო. სწორედ მანდ იყვნენ თავმოყრილნი საუკეთესო მოჩხუბრები შერეული საბრძოლო ხელოვნებებიდან. აზიელები თავიდან აქცენტს აკეთებდნენ პურორესუზე (იაპონური რესლინგი), მაგრამ მოგვიანებით, ისინი მთლიანად ახალ მიმდინარეობაზე გადაერთვნენ.
ქართული MMA-ს პირველი ნაბიჯები
RINGS-ში გამოდიოდა უამრავი ცნობილი მებრძოლი, მაგალითად - რენდი კუტიური, დენ ჰენდერსონი, ანტონიუ ნოგეირა, მაგომედხან გამზათხანოვი, კიოში ტამურა, აკიდა მაედა და რასაკვირველია, ფიოდორ ემელიანენკო. დიახ, შერეული საბრძოლო ხელოვნებების ლეგენდამ სწორედ აზიაში დაიწყო თავისი ტრიუმფალური გზა.
Rings-ის სრულფასოვანი წევრები ქართველი მებრძოლებიც იყვნენ. იაპონურ პრომოუშენში ჩხუბობდნენ ძმები ამირან და ტარიელ ბიწაძეები, ზაზა ტყეშელაშვილი, ლევან ლაგვილავა, ბაკურ გოგიტიძე, თენგიზ თედორაძე, გეგა გეგეშიძე, ვეფხვო ბარდანაშვილი, ილია ტლაშაძე, ლევან ებანოიძე და ზაურ ცხადაძე.
RINGS-ი იმითაც იყო ცნობილი, რომ პრომოუტერები სხვა ქვეყნებშიც მართავდნენ ბრძოლებს, მაგალითად საქართველოშიც - 1999 წლის 8 ოქტომბერს ჩვენთან შედგა ღონისძიება სახელით Rings Georgia, რომელზეც 5-მა ქართველმა მებრძოლმა თავის უცხოელ მეტოქეებს მოუგო.
ბაკურ გოგიტიძემ დაამარცხა მიხაილ ილიუხინი, ზაურ ცხადაძემ - დიმიტრი პეტკოვი, ზაზა ტყეშელაშვილმა - მაგომედხან გამზათხანოვი, ტარიელ ბიწაძემ - იუპ კასტელი, კობა ტყეშელაშვილმა კი იასუჰიტო ნამეკავა. ქართველი მებრძოლები შეიძლება ითქვას, რომ იაპონური პრომოუშენის ოლ სტარს დაუპირისპირდნენ
საქართველო V რუსეთი
2000 წლის 16 აგვისტოს ქართველი მებრძოლები შეხვდნენ რუს მოწინააღმდეგეებს Rings: Russia vs. Georgia-ზე. ივენთი შედგა ქალაქ ტულაში, მისი წამყვანი მსახიობი ამირან ამირანაშვილი იყო. სწორედ იმ ღონისძიებაზე გამართა ემელიანენკომ რიგით მე-2 ჩხუბი თავის კარიერაში.
რუსი მებრძოლის მოწინააღმდეგე იყო ლევან ლაგვილავა, რომელიც მომავალმა ლეგენდამ საბმიშენით დაამარცხა. მათ გარდა, მაყურებელმა იხილა კიდევ 9 ქართულ-რუსული წყვილი და ჩვენი მხრიდან მოგებულები გამოვიდნენ ამირან ბიწაძე, გეგა გეგეშიძე, ილია ტლაშაძე და თენგიზ თედორაძე.
ქართველი ჩემპიონი
RINGS-ის დაღმასვლა დაიწყო 2002 წლიდან, პრომოუშენი გაკოტრდა, მებრძოლებმა კი სხვა ორგანიზაციებს მიაშურეს. სანამ ეს მოხდებოდა, ქართველმა მებრძოლებმა სამუდამოდ დაამახსოვრეს იაპონელებს თავი. პირველ რიგში გამოსარჩევები არიან ძმები ტარიელ და ამირან ბიწაძეები, რომლებიც აზიაში 1995 წლიდან ჩხუბობდნენ.
ტარიელი ერთი წლის განმავლობაში (1998 წლის 29 მაისი - 1999 წლის 22 მაისი) ჩემპიონის ტიტულსაც კი ატარებდა მძიმე წონით კატეგორიაში. ქართველმა ქამარი წაართვა ლეგენდარულ კიოში ტამურას, მაგრამ მოგვიანებით, მეტოქემ რევანშის აღება შეძლო. სხვა გამორჩეული მებრძოლები, რომლებსაც მოუგო ბიწაძემ: იოპ კასტელი, იოშიჰისა იამამოტო, თანაც 2-ჯერ, ჰანს ნიმანი, აგრეთვე 2-ჯერ, ბარტ ვეილი და სხვები.
