2025 წლის საქართველოს დრიფტის ჩემპიონატის მე-4 ეტაპი ზუგდიდში ჩატარდა, სადაც გამარჯვებული სატურნირო ცხრილის ლიდერი, გიორგი გრიგალაშვილი გახდა.
გრიგალაშვილმა ასპარეზობა TOP 16-ში დაიწყო, სადაც 2013 წლის დრიფტის სერიების ჩემპიონი, გიორგი სარიშვილი დაამარცხა, TOP 8-ში კი გიორგი კოდუას აჯობა. TOP 4-ში მან თანაგუნდელს, ნუკრი სალიას აჯობა და ფინალის საგზური მოიპოვა.
ბადის მეორე მხრიდან ფინალში ირაკლი შალიკაშვილი გავიდა, რომელმაც პირველი ბრძოლა TOP 8-ში ჩაატარა და ლუკა ღარიბაშვილს მოუგო, ხოლო TOP 4-ში ჯეიჰუნ სულეიმანი დაამარცხა. ფინალურ დაპირისპირებაში გამარჯვება გიორგი გრიგალაშვილს დარჩა და სატურნირო ცხრილში ლიდერობა გაიმყარა.
საქართველოს დრიფტის სერიების 2025 წლის სეზონის ბოლო, მე-5 ეტაპი რუსთავის საერთაშორისო ავტოდრომზე 12 ოქტომბერს გაიმართება და ჩემპიონი გამოვლინდება.
