დღეს კატარის დედაქალაქ დოჰაში კალათბურთში 2027 წლის მსოფლიოს ჩემპიონატის საკვალიფიკაციო ეტაპის წილისყრა გაიმართა. გაირკვა რომელ ჯგუფში იასპარეზებს საქართველოს ნაკრები.
ევროპის საკვალიფიკაციო ჯგუფებში მონაწილეობას 32 ნაკრები მიიღებს. აღნიშნული 32 გუნდიდან 24 ევრობასკეტ 2025-ის მონაწილეა, ხოლო დარჩენილი 8 ადგილისთვის ეს 12 ნაკრები იბრძოლებს აგვისტოში: ხორვატია, უკრაინა, უნგრეთი, ბულგარეთი, ჰოლანდია, ჩრდილოეთ მაკედონია, დანია, სლოვაკეთი, ნორვეგია, ავსტრია, რუმინეთი და შვეიცარია.
საქართველო A ჯგუფში იასპარეზებს, ჩვენი გუნდის მეტოქე ესპანეთი, პრესაკვალიფიკაციო ჯგუფის გამარჯვებული უკრაინა/შვეიცარია/სლოვაკეთის და ხორვატია/დანია/ნორვეგიის პრესაკვალიფიკაციო ჯგუფის მეორეადგილოსანი იქნება.
საქართველოს ნაკრებს მსოფლიოს ჩემპიონატის საგზურისთვის, ორი საკვალიფიკაციო ეტაპის გავლა მოუწევს. პირველი ჯგუფიდან შემდგომ ეტაპზე 3 საუკეთესო გავა და ჯგუფ B-ის 3 საუკეთესოს დაუპირისპირდება, რომელ ჯგუფშიც მოხვდნენ - საბერძნეთი, მონტენეგრო, პორტუგალია და ჩრდილოეთ მაკედონია/უნგრეთი/რუმინეთის პრე-საკვალიფიკაციო ჯგუფის გამარჯვებული.
პირველი ეტაპის 6 მატჩისთვის გამოყოფილი იქნება 3 სათამაშო ფანჯარა, რომელიც 2025 წლის ნოემბერში დაიწყება და 2026 წლის ივლისში დასრულდება.
მეორე ეტაპზე გასული 24 ნაკრები 4 ჯგუფში განაწილდება. თამაშები 2026 წლის აგვისტოში დაიწყება, ნოემბერში გაგრძელდება და 2027 წლის თებერვალში დასრულდება. თითო ჯგუფიდან გასული 3-3 ნაკრები (ჯამში 12 ქვეყანა) მსოფლიოს 2027 წლის ჩემპიონატის საგზურს მოიპოვებს.
შეგახსენებთ,საქართველოს ნაკრებმა მსოფლიოს ჩემპიონატზე პირველად 2023 წელს იასპარეზა და ჯგუფური ეტაპის დაძლევა მოახერხა. საქართველო მსოფლიოს პირველობაზე 16 საუკეთესო ნაკრებში მოხვდა და ახლა შანსი აქვს, მუნდიალზე ზედიზედ მეორედ იასპარეზოს.
ფოტო: საქართველოს კალათბურთის ფედერაცია
