UFC 309 - მეფე დაბრუნდა! ჯონ ჯონსის ნოკაუტი და ოლივეირას გიჟური ბრძოლა

UFC 309-ის უმაგრესი მთავარი ქარდი მაურისიო რუფიმ გახსნა. მებრძოლმა, რომლის ანგარიშზეც 10 მოგებიდან 10 ნოკაუტი იყო. ამ ბრძოლაშიც რუფიმ სცადა, რომ მისი 100%-იანი KO მაჩვენებელი არ გაეფუჭებინა, თუმცა მოკლე ვადაზე შემოსული ლონტოპი ოქტაგონზე არაფრის დასათმობად არ შესულა. პირველი ორი რაუნდის განმავლობაში მაურისიომ მართლაც ძალიან მაგრად ცემა ჯეიმსი, თუმცა მიუხედავად ნოკდაუნებისა და უდიდესი ზიანისა, ლონტოპი უბრალოდ არ ნოკაუტდებოდა. მესამე რაუნდში ძალიან საინტერესო რამ ვიხილეთ. თურმე მაურისიო რუფი იღლება, თანაც ძალიან. ამ ბრძოლაში კი ლონტოპი ცდილობდა ჭიდაობას, თუმცა აქტიურ გრეპლინგს ადგილი არ ჰქონია, მაგრამ რუფი მაინც მაგრად დაიღალა. ეს კი ბადებს ლოგიკურ კითხვას - როგორ კონდიციებში იქნება ის თუ მეტოქედ მაღალი დონის მოჭიდავე ეყოლება, ისეთი რომელიც მას მიწაზე გადაყვანას ბრძოლის დაწყებისთანავე ეცდება? თანაც Lightweight-ში კარგი მოჭიდავეების ნაკლებობა ნამდვილად არ იგრძნობა. როგორც არ უნდა იყოს, რუფიმ მესამე რაუნდი დათმო, თუმცა, საბოლოოდ ბრძოლაში გამარჯვების მოპოვება დამსახურებულად მოახერხა და ფინიშის ვერ აღების მიუხედავად ისეთ სტილში იჩხუბა, რომ მის მომდევნო ბრძოლა ყველანი დაველოდებით, სადაც დარწმუნებული ვარ, რომ ისევ უმაგრეს სანახაობას ვიხილავთ.

ბო ნიკალი VS. პოლ კრეიგი

ბო ნიკალისა და პოლ კრეიგის ბრძოლაც საკმაოდ დაძაბული აღმოჩნდა, მაგრამ პირადად მე იმედები გამიცრუვდა. კი, ბო ნიკალმა აჩვენა, რომ დგომშიც შეუძლია ბრძოლა, თუმცა ძალიან მინდოდა, რომ ამ ჩხუბში გრეპლინგის მცირედი გაცვლები მაინც მენახა. პოლ კრეიგმა Light Heavyweight-დან Middleweight-ში გადმოინაცვლა და ნამდვილი გოლიათი იყო ბო ნიკალთან შედარებით, რომელიც დავითს განასახიერებდა, მაგრამ კრეიგმა მისი გაბარიტები საერთოდ ვერ გამოიყენა. როგორც საბრძოლო კვირის ვლოგებში ვნახეთ შოტლანდიელს მემარცხენე ბო ნიკალის წინააღმდეგ მხოლოდ ჯები და Roundhouse Kick ჰქონდა მომზადებული, რაც ცხადია American Top Team-ის (ამერიკული ერთ-ერთი საუკეთესო MMA გუნდი) მოსწავლის წინააღმდეგ საკმარისი არ იქნებოდა.

 საბოლოოდ კი ბო ნიკალმა კრეიგი ზიანით გაუშვა სახლში და მშვიდად 30-27 ანუ სამივე რაუნდის გამარჯვებით დაამთავრა ბრძოლა. რეალურად ჩემთვის ნიკალმა ვერაფერი დაამტკიცა, იმიტომ, რომ კრეიგის დგომში ცემა, ვფიქრობ, განსაკუთრებულს არაფერს ნიშნავს. მაინტერესებდა რას დაუპირისპირებდა გამოცდილი მოჭიდავე კრეიგის ჯიუ-ჯიცუს, თუმცა ბო კვლავ დაუმარცხებელია და მის მორიგ მაგარ ბრძოლებს ძალიან მალე ვიხილავთ.

ჩარლზ ოლივეირა VS. მაიკლ ჩენდლერი

ამ ბრძოლაში ნამდვილ ომს ველოდი, თუმცა ჩარლზმა და მაიკლმა მოლოდინებს მაინც გადააჭარბეს. ოთხი რაუნდის განმავლობაში ჩარლზ ოლივეირამ შემოგვთავაზა დომინაციის მასტერკლასი. „დუ ბრონქსმა" ჩენდლერს დგომში უმძმესი დარტყმები მიაყენა. სართულებს გამუდმებით ცვლიდა, უტევდა იდაყვებით, მუხლებით და საერთოდ ყველაფრით. ტანში მძიმე დარტყმები მიაყენა Front Kick-ებითა და მუხლებით, წინა ფეხი Low Kick-ებითა და Oblique Kick-ებით დაუზიანა, ოლიმ ჩენდლერს დგომშიც რამდენჯერმე საკმაოდ მძიმედ მოარტყა, მაგრამ მთავარი დომინაცია პარტერში მოდიოდა. ჩარლზი მაიკს უმაგრესს გდებებს უკეთებდა და მიწაზე უშანსოდ აკონტროლებდა. თუმცა, ჩენდლერმა მეხუთე რაუნდში მაინც მოაწყო ქაოსი, უმძიმეს მდგომარეობაში ჩააგდო ჩარლზი და მეტოქე კინაღამ დააფინიშა მას შემდეგ, რაც ოთხი რაუნდის განმავლობაში მიწასთან სწორდებოდა. აქ, სხვათაშორის, მსაჯებისგან ძალიან უკმაყოფილი ვიყავი, რადგან ვფიქრობ, რომ ჩარლზს ძალიან ბევრი დარტყმა მოხვდა კეფაში, რაც მსაჯის ყურადღებას იმსახურებდა.

 თუმცა, ყოფილმა ჩემპიონმა მოახერხა და გადარჩა, გარდი დაიბრუნდა, ჩენდლერს სამკუთხედითაც დაემუქრა, შემდგომ ფეხზე წამოდგა და ბრძოლა უმალ მიწაზე გადაიყვანა. საბოლოოდ, ჩარლსმა მსაჯების ერთსულოვანი გადაწყვეტილებით მოიგო და ცარუკიანსა და მახაჩევს შორის მოგებულთან საჩემპიონო ბრძოლისკენ მიმავალი ბილეთი გაინაღდა. ჩენდლერმა კი მაყურებელზე წარუშლელი შთაბეჭდილების მოხდება ისევ მოახერხა და ბრძოლის შემდგომ კონორ მაკრეგორთან ან BMF ქამრის მფლობელ მაქს ჰოლოუეისთან ბრძოლის სურვილი გამოთქვა. ვფიქრობ, ორივე პოტენციური მეტოქე „რკინის მაიკისთვის" ძალიან მაგარი ვარიანტია.

ჯონ ჯონსი VS. სტიპე მიოჩიჩი

დიდი ბიჭების ჯახში ყველაფერი ვიხილეთ, მაგრამ ახლა მოკლედ აღგიწერთ რა მოხდა. როგორც პრევიუში ვთქვი, სტიპე აქ წასაგებად არ იყო მოსული. ბევრს ეგონა, რომ ეს ცალკარა ბრძოლა იქნებოდა, მაგრამ სტიპემ არაერთხელ გამოაჩინა კბილები. პირველ რაუნდშივე ჯონსმა დომინაცია დაიწყო. შესაძლოა ჯონმა საწყისი რაუნდი 10:8-ც, რადგან უმაგრესი გდება შეასრულა და პარტერში იდაყვებითაც ძალიან მაგრად იმუშავა, თუმცა მეორე რაუნდში სტიპე ბრძოლაში ისე დაბრუნდა, როგორც, ალბათ, ხანძრების შემდგომ სახლში ბრუნდება ხოლმე - ძალიან მშვიდად. დაბრუნდა და დგომში აშკარად ბევრად უკეთესი რაუნდიც ჰქონდა. მეორე ხუთწუთეულში სტიპემ ჯონსს არაერთი დარტყმა გაუტარა, თუმცა ჯონსი ხიფათისგან კარგად გარბოდა. საბოლოოდ რაუნდი ზიანის მიღების გარეშე ჩაამთავრა.

ჯონსის საბრძოლო IQ, ტალანტი და მდიდარი ტექნიკური არსენალი აქაც გამოჩნდა. მან ყველაფერი გვაჩვენა. მიოჩიჩი ჯერ პარტერში დაჩაგრა, შემდგომ დგომში ფეხებით დაიწყო მუშაობა და ბრძოლის ბოლო რაუნდებში ზიანის ინვესტირება. ჯონსმა მეტოქეს ტანი აშკარად ატკინა, თუმცა მოვლენები არ დაუჩქარებია. ჩემპიონი დონეებს აქტიურად ცვლიდა - ტანსა და სახეში მონაცვლეობით უტევდა. მაშინ, როდესაც მიოჩიჩი მხოლოდ კრივში პოულობდა წარმატებას, ჯონსი ცდილობდა გარედან ემუშავა და მიოჩიჩი ნელ-ნელა დაეშალა. სტიპე მაგრად იდგა და თითქმის სამ რაუნდს კარგად გაუძლო, მაგრამ ტანში მიღებულმა ზიანმა თავისი ქნა. ჯონსი ცაცია დგომში დგებოდა და ფეხის უბრალო დარტყმებით მიოჩიჩს ღვიძლში უტევდა. მაშინ როდესაც მიოჩიჩი ტანის არეში მისგან მარჯვნივ ანუ ღვიძლში დარტყმას ელოდა, ჯონსმა მოულოდნელად უმძიმესი დარტყმა ბრუნში შეუსრულა და სტიპეს მარცხენა მხარეს პირდაპირ ნეკნებში მოახვედრა. ამ დარტყმამ სტიპე მაშინვე ჩაკეცა, ფინიში უკვე დროის ამბავი იყო. ჯონსმა დონალდ ტრამპის გამარჯვების ცეკვაც შეასრულა და შემდგომ ინტერვიუში განაცხადა, რომ ჯერ არ აქვს ბოლომდე გადაწყვეტილი წასვლა - გააჩნია რას შესთავაზებენ მას UFC-ის ბოსები.

  
 ძალიან მაგარი ივენთის დასასრული ასეთი იყო, მეფემ გვირგვინი შეინარჩუნა, სტიპემ კი კარიერის უკანასკნელი ბრძოლა ჩაატარა, თანაც ისე, რომ მის ლეგენდას არაფერი მოჰკლებია. სტიპე მიოჩიჩი UFC-ის აბსოლუტური ლეგენდის სახელით ტოვებს.