დროის გასვლასთან ერთად, 2025 წლის ერთ-ერთი ყველაზე მნიშვნელოვანი PPV ღონისძიება - UFC 322 ახლოვდება. ზემოხსენებული ივენთი მრავალი ორთაბრძოლებითაა სავსე, თუმცა ყველაზე მნიშვნელოვანი, რომელსაც MMA-ს გულშემატკივრები ძალზედ დიდი ხანია ელოდებიან - ისლამ მახაჩევისა და ჯეკ დელა მადალენას დაპირისპირებაა. UFC 322 ნიუ იორკში, მედისონ სქვეარ გარდენზე გაიმართება.
ისლამ მახაჩევი VS ჯეკ დელა მადალენა
მსუბუქი დივიზიონის ყოფილი ჩემპიონის - ისლამ მახაჩევის დომინაცია, 70კგ წონით კატეგორიაში ყველასათვის ნაცნობი ფენომენია. დაღესტნელი ათლეტის მოგებათა სერია 16 ბრძოლას შეადგენს, ამ სტატისტიკაში კი შედიან ისეთი სახელოვანი მებრძოლები, როგორებიცაა: რენატო მოიკანო, არმან ცარუკიანი, დენ ჰუკერი, ალექსანდერ ვოლკანოვსკი (2ჯერ), ჩარლზ ოლივეირა და დასტინ პორიე. მახაჩევის ზემოხსენებული მიღწევები UFC-ში, მსუბუქი დივიზიონის ისტორიაში საუკეთესოა, ამჟამად კი ის საკუთარი სტატუსის ამაღლებას, ზედა დივიზიონის ქამრის ხელში ჩაგდებით შეეცდება. ქვესაშუალო წონის ამჟამინდელი ჩემპიონი - ჯეკ დელა მადალენა ახალგაზრდა ავსტრალიელი ათლეტი გახლავთ, რომელმაც ჩემპიონის სტატუსის მოპოვება ამავე წლის 10 მაისს, ბელალ მუჰამედის დამარცხებით შეძლო. თუ ამ დაპირისპირებას ობიექტურად, ანალიტიკურად განვიხილავთ, პირველი დასკვნა იქნება შემდეგნაირი: ორივე სპორტსმენი ძალზედ კონკურენტუნარიანია. ისლამი, თავისი დახვეწილი ჭიდაობის უნარისა და სტრაიკინგის გამო, ერთ-ერთ ყველაზე სრულყოფილ MMA-ს მებრძოლადაა მიჩნეული. მიუხედავად იმისა, რომ კარიერის განმავლობაში მახაჩევის მთავარი იარაღი გდებები და საბმიშენები გახლდათ, მის ანგარიშზე არის გარკვეული შეხვედრები, რომელშიც ისლამმა შეძლო და ფანებს საკუთარი სტრაიკინგის დონე დაუმტკიცა. გამოვარჩევდი მეორე ბრძოლას ვოლკანოვსკისთან, სადაც მახაჩევმა გამარჯვების მოპოვება ტექნიკური ნოკაუტით, კონკრეტულად კი ჰედქიქით შეძლო. რაც შეეხება სხვა დაპირისპირებებს, მათი უმრავლესობა დაღესტნელმა მახრჩობელა, ან მტკივნეული ილეთით დაასრულა, თუმცა ბრძოლის განმავლობაში, მეტოქეებს დგომშიც შესამჩნევი წინააღმდეგობა გაუწია. რაც შეეხება მადალენას - თამამად შემიძლია ვთქვა, რომ ჯეკი მოკრივეა, ვინაიდან იგი ასპარეზობისას მძიმე ბოქსის კომბინაციებზეა კონცენტრირებული და შეხვედრების დიდ ნაწილსაც ნოკაუტებით იგებს. ჯეიდიემის მთავარ პრობლემად მაყურებელთა უმეტესობა მის გრეპლინგს მიიჩნევს, თუმცა როგორც ავსტრალიელი ჩემპიონისგან ვიგებთ, მის საბრძოლო კემპში, დიდი ყურადღება გრეპლინგის დახვეწას ეთმობა. უნდა ვაღიაროთ, რომ რა დონეზეც კარგია მადალენას გდებებისაგან თავდაცვა, იმ დონეზე საშიშია ისლამის ჭიდაობა და მიწაზე გადაყვანის შემდგომ არსებული საფრთხეები. ამ ყველაფერს ბევრად საინტერესოს მახაჩევის ხანგრძლივი, ხარისხიანი გამოცდილება ხდის. ჯეკს საკუთარი სიძლიერის დამტკიცება ქვესაშუალოს ძალზედ სახიფათო მებრძოლებთან მოუწია, გამოვარჩევდი ბრძოლებს გილბერტ ბარნსთან და ბელალ მუჰამედთან, მაგრამ მისი რეზიუმე, მახაჩევის დამარცხებული ლეგენდების სიასთან ახლოსაც ვერ მივა. დაღესტნელ ათლეტს საკუთარი საჩემპიონო ხასიათისა და ტალანტის გამოცდა საუკეთესო მსუბუქწონოსნებთან მოუხდა. მიუხედავად ამ ყველაფრისა, მადალენას უპირატესობად შეგვიძლია მივიჩნიოთ ფიზიკური ზომა და ნოკაუტის ძალა, რომელსაც არაერთი ათლეტისთვის შეუქმნია გადამწყვეტი პრობლემა. საინტერესოა, როგორ დასრულდება 2025 წლის ერთ-ერთი მნიშვნელოვანი ივენთი და შეძლებს თუ არა მახაჩევი სანატრელი ქვესაშუალო დივიზიონის ქამრის მოპოვებას.
ვალენტინა შევჩენკო VS ჟანგ ვეილი
UFC 322-ის Co-main ღონისძიების სასწორზე ქალთა უმსუბუქესი დივიზიონის ქამარი დევს. ჩინელი კონტენდერი - ჟანგ ვეილი, ვალენტინა შევჩენკოს დამარცხებით უმსუბუქესი წონითი კატეგორიის ტიტულის მოპოვებას შეეცდება. ზემოხსენებული დაპირისპირება, შესაძლოა წლის ერთ-ერთ საუკეთესო ქალთა ბრძოლად დასახელდეს, რადგან ორივე მებრძოლი, შეხვედრათა უმეტესობაში, სანახაობრივი, ფინიშზე ორიენტირებული სტილით გამოირჩევიან. ვალენტინა შევჩენკო ქალთა MMA-ს ისტორიაში, ერთ-ერთ ყველაზე ტექნიკურ და მრავალფეროვან მებრძოლადაა მიჩნეული, რომელიც მისი მაღალი დონის ძიუდოსა და შესანიშნავი კიკბოქსინგის დამსახურებაა. ყირგიზელი სპორტსმენი უკვე ათ წელზე მეტია UFC-შია და ამ ხნის განმავლობაში, არაერთი გამოჩენილი მეტოქე დაამარცხა — მათ შორის ჰოლი ჰოლმი, ჯესიკა აი, ალექსა გრასო, იოანა ენდჟეიჩიკი და ლაურენ მერფი. ზემოხსენებული ათლეტის მთავარი კოზირი ტექნიკა და მაღალი საბრძოლო აიქიუა. ბრძოლის დროს კარგად გამოსდის დისტანციის კონტროლი და ოპონენტის მიწაზე გადაყვანა სწორ მომენტში. მიუხედავად იმისა, რომ შევჩენკოს პრიორიტეტი სტრატეგიული გამარჯვებაა, ბოლო წლებში მან გვაჩვენა, რომ საჭიროების შემთხვევაში, აგრესიულ ტემპშიც შესანიშნავად იგერიებს მოწინააღმდეგეს. რაც შეეხება ჟანგ ვეილის, შევჩენკოს მსგავსად, ისიც ქალთა MMA-ის "GOAT"-ად ითვლება. ჟანგი სტილისტიკურად და ხასიათით, ვალენტისაგან ცალსახად განსხვავებული ათლეტია. ჩინელი სპორტსმენი ცნობილია საკუთარი გამძლეობითა და უკიდურესად აგრესიული, სწრაფი შეტევებით. სტროუვეითის ყოფილმა ჩემპიონმა, წინა დივიზიონში ქამრის დაცვა, წარმატებით, რამდენჯერმე მოახერხა, ახლა კი უმსუბუქესი დივიზიონის ქამრის მოპოვება და ორი წონის ჩემპიონობა სურს. ვეილის სტრაიკინგის ფესვები, უმეტესწილად, ტრადიციული ჩინური საბრძოლო ხელოვნებიდან, კონკრეტულად კი უშუ სანდადან მოდის, რომელსაც თანამედროვე კიკბოქსინგის ელემენტები ერთვის. ყოფილი სტროუვეითის ჩემპიონი გამოირჩევა აგრესიული წნეხით, სწრაფი კომბინაციებითა და კლინჩში მუშაობით. თუ შევჩენკო შეძლებს დისტანციის შენარჩუნებას და ბრძოლის მიწაზე გადაყვანას, მისი გამარჯვების შანსი მკვეთრად გაიზრდება. თუ ჟანგი მოახერხებს ბრძოლის შენარჩუნებას დგომში, ახლო დისტანციაზე, სადაც მის დარტყმის სიმძლავრეს და აგრესიას მეტი შესაძლებლობა მიეცემა, შესაძლოა, რომ შევჩენკოს საფრთხე შეექმნას.
შონ ბრეიდი VS მაიკლ მორალესი
ზემოხსენებულ ქვესაშუალო დივიზიონის დაპირისპირებას დიდი დატვირთვა აქვს, რადგან ამ ბრძოლის შედეგით, მომავალი ტიტულის ჩელენჯერი გამოვლინდება. ამჟამად, ინგლისელი მებრძოლი - შონ ბრეიდი დამაჯერებელ გამარჯვებათა სერიაზე იმყოფება. გამოვარჩევდი მის უკანასკნელ ფინიშს ამავე დივიზიონის ყოფილი ჩემპიონის - ლეონ ედვარდსის წინააღმდეგ. ბრეიდი კლასიკური გრეპლერია, რომლის მთავარი უპირატესობა დომინანტური კლინჩი და გდებებია. აღსანიშნავია, რომ შონი ფიზიკურად ძლიერია და ბრძოლის განმავლობაში, მისი მეტოქეების დასუსტების მიზეზი, ხშირ შემთხვევებში, ბრეიდის მუდმივი წნეხი გახლავთ. შონის მთავარ პრობლემად, ხშირად გულშემატკივრები დგომში აგრესიისა და დარტყმის ძალის ნაკლებობას ასახელებენ. რაც შეეხება მაიკლ მორალესს, ის MMA-ს ახალი თაობის დაუმარცხებელი წარმომადგენელია, რომელიც კარგი სტრაიკინგითა და ფეთქებადი ხასიათით გამოირჩევა. მაიკლის მთავარ იარაღად შეგვიძლია მისი ბრძოლის ადრე დასრულების უნარი მივიჩნიოთ, რომლის მიზეზიც, უმეტესწილად, მძიმე, გამთიშავი კომბინაციებია. ამ ფაქტს ადასტურებს მორალესის სტატისტიკაც - ეკვადორელ სპორტსმენს კარიერაში ჩატარებული 18 ბრძოლიდან, 13 ნოკაუტით აქვს დასრულებული. ანალიტიკურად, ეს დაპირისპირება კლასიკური „სტრაიკერი VS გრეპლერი“ იქნება. ბრეიდი ბრძოლის მიწაზე წარმართვას შეეცდება, ხოლო მორალესი უპირატესობას დგომში მუშაობას, კონკრეტულად კი ნოკაუტის მოპოვებას მიანიჭებს.
