UFC Fight Night Qatar-მდე, სულ რაღაც ერთი დღე დარჩა. წინ გველის ღონისძიება, რომელიც ორ მეზობელ დივიზიონში (მსუბუქსა და ქვესაშუალოში) ვითარებას მნიშვნელოვნად შეცვლის. ქარდზე ვიხილავთ ისეთ დაპირისპირებას, რომელსაც არა მხოლოდ ცვლილებები მოჰყვება 70კგ წონითი კატეგორიის რეიტინგში, არამედ მომავალ ტიტულის ჩელენჯერსაც გამოავლენს.
არმან ცარუკიანი V დენ ჰუკერი
ლაითვეითში კიდევ ერთი მაღალი დონის დაპირისპირება გველის — გამოცდილი სტრაიკერი დენ ჰუკერი, MMA-ს ახალი თაობის წარმომადგენელს - არმან ცარუკიანს დაუპირისპირდება. ზემოხსენებულ ორთაბრძოლას ორივე ათლეტისთვის გადამწყვეტი მნიშნველობა აქვს, რადგან ამ ბრძოლით შესაძლოა სატიტულო შეხვედრის მომავალი კანდიდატი გადაწყდეს.
გარკვეული პერიოდი, ცარუკიანის მიმართ, გულშემატკივრებისგან გულგრილი დამოკიდებულება მოდიოდა, რომელიც მისი წელიწად-ნახევრიანი პაუზითა და უკანასკნელი ინციდენტით იყო გამოწვეული. ცნობილია, რომ არმანს, ისლამ მახაჩევთან რევანში UFC 311-ზე უნდა გაემართა, თუმცა ჯანმრთელობის მიზეზების გამო, მან ამ ღონისძიებაზე ასპარეზობა ვერ მოახერხა.
როგორც ახალგაზრდა ათლეტისგან ვიგებთ, მის ამჟამინდელ საბრძოლო კემპში პრიორიტეტი დასვენება და ორგანიზმის აღდგენაა, რათა იგივენაირი შემთხვევა არ განმეორდეს. მიუხედავად იმისა, რომ ცარუკიანი საშუალო პერიოდზე დიდ ხანს გახლდათ არა-აქტიური, მისი საბრძოლო შესაძლებლობები, რომელის მეშვეობითაც იგი 70კგ დივიზიონის TOP-5-მდე მივიდა, არ უნდა დავივიწყოთ.
ცარუკიანს დამარცხებული ჰყავს მსუბუქი დივიზიონის ტოპ კონტენდერები: ჩარლზ ოლივეირა, ბენეილ დარიუში და სხვები. უპირველესყოვლისა, აღსანიშნავია არმანის შესაძლებლობები ჭიდაობასა და გრეპლინგში, რომელიც მას არაერთი ბრძოლის მოგებაში დაეხმარა.
გამოვარჩევდი შეხვედრას ერთ-ერთ საუკეთესო მსუბუქწონოსან ჩარლზ ოლივეირასთან, რომელშიც ცარუკიანმა გამარჯვება გდებებისა და მუდმივი წნეხის ფონზე მოიპოვა. მიუხედავად იმისა, რომ არმანმა მახაჩევთან პირველი შეხვედრა წააგო, უნდა ვაღიაროთ, რომ ეს დაპირისპირება ძალზედ ახლო და კონკურენტ უნარიანი გახლდათ, ვინაიდან, დებიუტანტმა არმანმა, გამოცდილი მახაჩევის მიწაზე გადაყვანა მოახერხა და მისი ჭიდაობისგანაც თავი არაერთხელ წარმატებით დაიცვა.
არმანის ანგარიშზე არსებული 22 მოგებიდან, 14 ფინიშითაა დასრულებული. ზემოხსენებულ სტატისტიკაში გადავაწყდებით როგორც მახრჩობელა და მტკივნეულ ილეთებს, ასევე სტრაიკინგის მეშვეობით მოპოვებულ გამარჯვებებსაც. გამოვარჩევდი დაპირისპირებებს ბენეილ დარიუშისა და ჯოელ ალვარეზის წინააღმდეგ.
თამამად შემიძლია ვთქვა, რომ ცარუკიანის გამორჩეული იარაღი გრაუნდ ენდ ფაუნდია, ვინაიდან მისი ტექნიკური ნოკაუტების უმეტესობა, მიწაზე, მძიმე დარტყმების მეშვეობით სრულდება. მისი ახალ ზელანდიელი მეტოქე - დენ ჰუკერი სტილისტიკურად ცალსახად განსხვავებული მებრძოლია.
ჰუკერი მსუბუქი დივიზონის ერთ-ერთ ყველაზე სანახაობრივ მებრძოლად ითვლება, რომელიც მისი აგრესიული კრივის შეტევებისა და უშიშარი ხასიათის დამსახურებაა. ჩემი აზრით, დენის ყველაზე გამორჩეული მახასიათებელი მისი ამტანობის უნარია - ოკეანელი მებრძოლისთვის, შეხვედრის განმავლობაში მიღებულ ზიანსა და დარტყმების რაოდენობას მნიშვნელობა არ აქვს, იგი ბრძოლას ჯიუტად განაგრძობს.
ამის ნათელი მაგალითია მისი დაპირისპირება დასტინ პორიეს წინააღმდეგ, რომელიც მსუბუქი დივიზიონის ისტორიაში ერთ-ერთ ყველაზე სისხლიან და სანახაობრივ ორთაბრძოლადაა მიჩნეული. როგორც ვახსენე, ჰუკერის პრიორიტეტი ბრძოლის მსვლელობისას მძიმე კრივის შეტევებია.
ის ასევე კარგად იყენებს ქიქებს, კონკრეტულად კი მუხლებს კლინჩში ყოფნის დროს. მიუხედავად იმისა, რომ არმანის დამარცხებულთა სიაში მაღალი დონის კონტენდერები შედიან, უნდა ვაღიაროთ, რომ ჰუკერის გამოცდილება UFC-ში მეტად გრძელი და ეკლიანია. კარიერის განმავლობაში დენი დაუპირისპირდა სახელ განთქმულ მებრძოლებს, როგორებიც არიან: ისლამ მახაჩევი, დასტინ პორიე, გილბერტ ბერნსი, პაულ ფელდერი, ალ იაკინტა, იაირ როდრიგეზი და მაიკლ ჩენდლერი.
ჰუკერის უპირატესობად ასევე შეგვიძლია მისი მსუბუქი დივიზიონისთვის შეუსაბამო სიმაღლე და წვდომი მივიჩნიოთ. იგი სიმაღლეში 1.83-ია, ცარუკიანი კი მასზე 13 სანტიმეტრით დაბალი გახლავთ. დენი ,რა თქმა უნდა, საკუთარი გრძელი კიდურების გამოყენებასა და დაპირისპირების დგომში წაყვანას შეეცდება, არმანის პრიორიტეტი კი დისტანციას ჩახურვა და მოწინააღმდეგის მიწაზე გადაყვანა იქნება.
რაც შეეხება ზემოხსენებულ სცენარს, ბრძოლის მიწაზე გადაყვანის შემთხვევაში, ჰუკერს ძალზედ დიდი საფრთხე ელის. შაბლონურად რომ ვთქვათ, მომავალი UFC Fight Night-ის მთავარი ბრძოლა - მოჭიდავე VS კიკბოქსიორი იქნება. დენ ჰუკერისთვის, გამარჯვების მოსაპოვებელი გზა ცარუკიანის გაცვლებში შეთრევა და ტექნიკური ნოკაუტი იქნება, ხოლო ახალქალაქელი სპორტსმენი მის მიწაზე გადაყვანასა და დასაბმითებას უნდა შეეცადოს.
