რეალ მადრიდში დიდი ცვლილებები დაანონსდა. სეზონის დასრულების შემდეგ გუნდს კარლო ანჩელოტი დატოვებს, მის ადგილს კი დიდი ალბათობით ჩაბი ალონსო დაიკავებს. ცვლილებები იქნება შემადგენლობაშიც — ზაფხულში რამდენიმე ფეხბურთელი სანტიაგო ბერნაბეუდან წავა, სამეფო კლუბი კი მინიმუმ 3-4 ტრანსფერის განხორციელებას გეგმავს.
წამსვლელთა სიაში შეიძლება იყოს როდრიგოც, რომელიც სათამაშო დროით უკვე დიდი ხანია, რაც უკმაყოფილოა. როგორც გავლენიანი ესპანური გამოცემები იუწყებიან, ბრაზილიელ ფეხბურთელს გუნდის დატოვება სეზონის დასაწყისშიც სურდა, თუმცა მაშინ კლუბმა ფეხბურთელი არ გაყიდა. როგორც ჩანს სიტუაცია არ შეცვლილა და 24 წლის შემტევი გუნდის გამოცვლაზე კვლავ ფიქრობს.
ფლორენტინო პერესს როდრიგოს შენარჩუნება სურს, თუმცა აქ მთავარი მაინც ფეხბურთელის სურვილია — როდრიგო თვლის, რომ ბევრად მეტ სათამაშო დროს იმსახურებს, თუმცა იმის ფონზე, რომ გუნდში ბევრი შემტევი ირიცხება, მისი სათამაშო დრო საგრძნობლად შემცირებულია. სიტუაცია შეიძლება ახალი მწვრთნელის მოსვლამ შეცვალოს, თუმცა ახლა რომ ფეხბურთელი რეალის დატოვებას ფიქრობს, ამაზე ბევრი საუბრობს.
როდრიგო რეალის ღირსებას 2019 წლიდან მოყოლებული იცავს. ფეხბურთელმა ამ დროში 267 მატჩი ჩაატარა, გაიტანა 68 გოლი და 50 საგოლე გადაცემითაც გამოიჩინა თავი. ბრაზილიელმა სამეფო კლუბთან ერთად 13 ტიტულიც მოიგო. 24 წლის ფეხბურთელს კლუბთან არსებული კონტრაქტი 2028 წლამდე აკავშირებს, მისი სატრანსფერო ფასი კი მინიმუმ €70-80 მილიონია.
