კანადელის ბოლო სეზონი ბაიერნში? - ამაზე გერმანიაში აქტიურად საუბრობენ, 24 წლის ფეხბურთელის სიტუაციას კი ტოპ კლუბები ყურადღებით აკვირდებიან. რეალ მადრიდი, რომ დევისით ინტერესდება, ეს საკმაოდ ძველი ამბავია და თუ ფეხბურთელი ზაფხულში გერმანიას დატოვებს, ფლორენტინო პერესი მზადაა ტრანსფერი დახუროს, თუმცა სამეფო კლუბის გარდა საქმეში კიდევ ორი გუნდია.
ჰანსი ფლიკი და ბარსელონა — კატალონიელთა ინტერესი დადასტურებული და რეალურია! გერმანელ სპეციალისტს კანადელთან მუშაობის გამოცდილება აქვს, შესაბამისად, თუ ფეხბურთელმა ბაიერნთან კონტრაქტი არ გაახანგრძლივა, ესპანეთში მორიგ ელ კლასიკოს ვიხილავთ. ბარსელონა მზადაა რეალ მადრიდს დევისის ტრანსფერზე კონკურენცია გაუწიოს.
და ბოლოს, მანჩესტერ იუნაიტედი — ინგლისელები საქმეში არიან და იმის მიუხედავად, რომ მთავარი მწვრთნელი შეიცვალა, დევისი მათთვის ერთ-ერთ მთავარ სამიზნედ მაინც რჩება. თანაც რუბენ ამორიმი 3-4-3 სქემით თამაშობს, რაც კანადელი ფლანგელისთვის იდეალური სათამაშო სქემაა.
ბაიერნი და დევისის აგენტები ახალ ხელშეკრულებაზე მუშაობას სეზონის ბოლომდე გააგრძელებენ. გერმანელები იმედიანად არიან და სჯერათ, რომ ფეხბურთელს ყველა სირთულის მიუხედავად, მაინც შეინარჩუნებენ.
კანადელი ფეხბურთელი ბაიერნის ღირსებას 2019 წლიდან მოყოლებული იცავს. დევისმა ამ დროში 209 მატჩის ჩატარება მოასწრო, 11 გოლის გატანა მოახერხა და 34 საგოლე გადაცემითაც გამოიჩინა თავი.
