ბარსელონაში ახალი სეზონისთვის მზადება უკვე დაიწყეს. კატალონიურ კლუბს რამდენიმე ფეხბურთელი დატოვებს, რაც იმას ნიშნავს, რომ ჰანსი ფლიკის გუნდს საკმაოდ დატვირთული ზაფხულის სატრანსფერო ფანჯარა ექნება.
ბოლო საათებში გავრცელებული ინფორმაციის თანახმად, კლუბის უფროსობამ ახალი მეკარის დამატება გადაწყვიტა და მთავარი სამიზნეც უკვე ცნობილია — ესპანიოლის 24 წლის მეკარე ჟოან გარსია!
იმის მიუხედავად, რომ ბარსელონა ვოიცეხ შესნის შენარჩუნებას გეგმავს, კლუბში ფიქრობენ, რომ ახალი მეკარის დამატება მაინც საჭიროა, შესაბამისად, ჟოან გარსიას ტრანსფერზე მუშაობა ოფიციალურად დაწყებულია. მეტიც, ესპანელ კიპერს კატალონიური კლუბის ვარიანტი ძალიან მოსწონს და ამ გარიგების წინააღმდეგი არ არის.
საქმეში არიან პრემიერ ლიგის კლუბებიც, კერძოდ არსენალი, ჩელსი და ასტონ ვილა, თუმცა ამ მომენტისთვის ფავორიტი ბარსელონაა. როგორც ცნობილი ხდება, კატალონიელები ფეხბურთელის კონტრაქტში ჩაწერილი გამოსასყიდი თანხის €25 მილიონის გააქტიურებას გეგმავენ. უახლოეს საათებში ამ პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი.
და ბოლოს, მარკ-ანდრე ტერ შტეგენის მომავალი — დადასტურებულად შეგვიძლია იმის თქმა, რომ ბარსელონა 33 წლის მეკარის სანაცვლოდ ყველა შეთავაზებას განიხილავს. საკმაოდ დიდი შანსია გერმანელმა კიპერმა ზაფხულში კატალონიური კლუბი დატოვოს.
