ევროპის მასშტაბით ტოპ კლუბები ზამთრის სატრანსფერო ფანჯრისთვის მზადებას უკვე შეუდგნენ. ამ სიაშია მანჩესტერ იუნაიტედიც, რომელსაც წესით და რიგით დატვირთული იანვრის თვე ექნება. ამ მომენტისთვის "წითელი ეშმაკების" პოტენციურ სამიზნეებზე საუბარი ჯერჯერობით ადრეა, მაგრამ უკვე ცნობილია იმ ფეხბურთელების ვინაობა, რომლებიც კლუბმა ტრანსფერზე დააყენა.
ტაილერ მალასია, მანუელ უგარტე და ჯოშუა ზირკზე — ამ ფეხბურთელებს უკვე განუცხადეს, რომ რუბენ ამორიმის გეგმებში არ შედიან და ზამთრის სატრანსფერო ფანჯრის დროს სჯობს სხვა გუნდებში გადაბარგდნენ.
რაც შეეხება კობი მეინუს, იმის მიუხედავად, რომ კლუბს ახალგაზრდა ფეხბურთელის გასხვისება არ სურს, თავად 20 წლის ნახევარმცველი განიხილავს ოლდ ტრაფორდის დატოვებას. ინგლისელი შუახაზელი სათამაშო დროით უკმაყოფილოა და ბოლო მომენტში რაიმე გაუთვალისწინებელი თუ არ მოხდა, 2026 წლის დასაწყისში მანჩესტერ იუნაიტედს დატოვებს და კარიერას სხვა გუნდში გააგრძელებს.
ზამთრის სატრანსფერო ფანჯრის მოახლოებასთან ერთად, მანჩესტერ იუნაიტედის სატრანსფერო გეგმებზე უფრო მეტი ინფორმაცია გახდება ცნობილი.
