როგორც ირკვევა, ჯენოა საქართველოს ეროვნული ნაკრებისა და კრაიოვას 23 წლის ნახევარმცველით, ანზორ მექვაბიშვილით სერიოზულად ინტერესდება და იანვარში დიდი შანსია ფეხბურთელის სანაცვლოდ, პირველი შეთავაზებაც გაკეთდეს.
"უახლოეს პერიოდში მინდა დავიწყოთ წარმატებული თანამშრომლობა ჯენოასა და აღმოსავლეთ ევროპის რამდენიმე კლუბს შორის. ამ ქვეყნებში მოთამაშე საუკეთესო ტალანტებს ექნებათ შესაძლებლობა ითამაშონ გენუური კლუბის მაისურით, მსოფლიოს ერთ-ერთ ყველაზე მნიშვნელოვან ჩემპიონატში, კერძოდ სერია ა-ში", - განაცხადა ჯენოას ახალმა მფლობელმა.
როგორც ირკვევა ჯენოა რუმინულ ბაზარზე აქტიურობას გეგმავს. ამ ქვეყანაში აქტიურად მუშაობენ დიდი სააგენტოები — მაგალითისთვის უნდა გამოვარჩიოთ GG11, რომელსაც საკმაოდ ახლო ურთიერთობა აქვს ჯენოასთან. ეს არის ძმები ჯუფრიდების მიერ დაარსებული იტალიური სააგენტო, რომელიც წლებია ამ საქმეშია ჩართული. ამ სააგენტოს წევრია ანზორ მექვაბიშვილიც, რომელიც როგორც უკვე ზემოთ ვთქვით, გენუური კლუბის ერთ-ერთი სამიზნე იქნება მოახლოებულ სატრანსფერო ფანჯარაზე. ჯენოა მილან ბადელის პოტენციურ შემცვლელს ეძებს და ქართველი ფეხბურთელი ერთ-ერთ შემცვლელად მოიაზრება.
ფეხბურთელის წარმომადგენლები ამ მომენტისთვის არც ადასტურებენ და არც უარყოფენ ჯენოას ინტერესს. უცნობია რა თანხად აფასებს კრაიოვა ანზორ მექვაბიშვილს, თუმცა იანვრის სატრანსფერო ფანჯრის მოახლოებასთან ერთად, ამ პოტენციურ გარიგებასთან დაკავშირებით უფრო მეტი ინფორმაცია გახდება ცნობილი.
ფოტო: Nakrebi.ge
