ინგლისური პრესა დიდ წმენდაზე ალაპარაკდა — მანჩესტერ სიტი ზაფხულის სატრანსფერო ფანჯარაზე, რამდენიმე ფეხბურთელის გაშვებას გეგმავს. განიხილება ისეთი ფეხბურთელების გაშვებაც, რომლებიც წლებია ეტიჰადის ბინადრების ლიდერებად ითვლებიან. ამ სიაშია ედერსონ მორაეშიც, რომელიც თუ ბოლო მომენტში რაიმე განსაკუთრებული არ მოხდა, ზაფხულში ეტიჰადს აუცილებლად დატოვებს.
უკვე ცნობილია ვის დამატებას შეეცდება მანჩესტერ სიტი ედერსონის პოზიციაზე — დიოგუ კოშტა, პორტოს 25 წლის მეკარე ზაფხულის #1 სამიზნე იქნება! "ქალაქელების" ინტერესი რეალური და დადასტურებულია. ფეხბურთელის წარმომადგენელთან პირველი კონტაქტი უკვე შედგა, უახლოეს თვეებში კი მოსალოდნელია, რომ სიტი პირველ ოფიციალურ შეთავაზებასაც გააკეთებს.
დიოგუ კოშტა პორტოს აკადემიის აღზრდილია, 2019 წლიდან კი პირველი გუნდის ღირსებას იცავს. ამ დროში პორტუგალიელმა 188 მატჩის ჩატარება მოასწრო, სადაც 79-ჯერ კარის მშრალად შენახვა მოახერხა.
პორტუგალიის ნაკრების პირველ ნომერს, პორტოსთან არსებული კონტრაქტი 2027 წლამდე აკავშირებს, დრაგაოს ბინადრები კი 25 წლის ფეხბურთელს დაახლოებით €50 მილიონად აფასებენ.
