ოფიციალურად — ტეო ერნანდესი ალ ჰილალის ფეხბურთელია! 27 წლის ფრანგმა განაპირმა მცველმა სამედიცინო შემოწმება უკვე გაიარა და კლუბთან 3-წლიანი კონტრაქტი გააფორმა. ალ ჰილალმა ტეოს სანაცვლოდ €25 მილიონი გადაიხადა.
მილანი და ტეო ერნანდესი ახალ კონტრაქტზე დაახლოებით ერთი წელი მუშაობდნენ, თუმცა ამის მიუხედავად მხარეებმა შეთანხმება ვერ მოახერხეს. იმის გათვალისწინებით, რომ ფრანგი მომდევნო წელს თავისუფალი აგენტი ხდებოდა, "როსონერისთვის" ფეხბურთელის გაყიდვა მიმდინარე სატრანსფერო ფანჯრის დროს პრიორიტეტული გახდა. განიხილებოდა ატლეტიკო მადრიდში გადასვლაც, თუმცა მხარეებმა შეთანხმებას ვერ მიაღწიეს. შემდეგ გამოჩნდა ალ ჰილალი და გარიგებაც დაიხურა. ტეო ერნანდესის წლიური ანაზღაურება ახალ კლუბში €25 მილიონამდე იქნება.
ტეო ერნანდესი მილანის ღირსებას 2019 წლიდან მოყოლებული იცავდა. ფრანგმა ფეხბურთელმა ამ დროში 262 მატჩის ჩატარება მოასწრო, გაიტანა 34 გოლი და 45 საგოლე გადაცემითაც გამოიჩინა თავი. ტეომ "როსონერისთან" ერთად ორი ტიტულის მოგებაც მოახერხა.
