მანჩესტერ იუნაიტედში ახალი სეზონისთვის მზადებას აქტიურად აგრძელებენ. რამდენიმე დღის წინ როგორც გაცნობეთ, ზაფხულში გუნდს დაახლოებით 9-10 ფეხბურთელი დატოვებს, რაც იმას ნიშნავს, რომ "წითელ ეშმაკებს" წინ საკმაოდ დატვირთული სატრანსფერო ფანჯარა ელოდებათ.
მაიკლ კერიკის საკითხი სეზონის დასრულების შემდეგ გადაწყდება, თუმცა ამის მიუხედავად, მანჩესტერ იუნაიტედის უფროსობამ პოტენციურ ტრანსფერებზე მუშაობა უკვე დაიწყო. გავლენიან ბრიტანულ წყაროებს თუ დავუჯერებთ, ოლდ ტრაფორდის ბინადრები ზაფხულში 5-6 ახალ მოთამაშეს დაიმატებენ.
ორი მცველი, ორი ნახევარმცველი და ორიც შემტევი - ზაფხულის გეგმა გაწერილია. კლუბთან დაახლოებული წყაროების ინფორმაციით, მანჩესტერ იუნაიტედი როგორც ცენტრალური მცველის, ისე განაპირა მცველის დამატებასაც გეგმავს. სიაში რამდენიმე ფეხბურთელია, თუმცა მიკი ვან დევ ვენის (ტოტენჰემი) მიმართ ინტერესი უკვე დადასტურდა.
რაც შეეხება ნახევარდაცვას, იმის ფონზე რომ გუნდს კაზემირო და მანუელ უგარტე ტოვებენ, სასიცოცხლოდ მნიშვნელოვანია საყრდენი ზონის გაძლიერება. მანჩესტერ იუნაიტედის სიაში 6 ფეხბურთელია, მათ შორის სანდრო ტონალი (ნიუკასლი), აურელიენ ჩუამენი (რეალ მადრიდი), კარლოს ბალება (ბრაიტონი), ადამ ვორტონი (კრისტალ პალასი), ალექს სკოტი (ბორნმუთი) და ელიოტ ანდერსონი (ნორინგემ ფორესტი).
ყველა ამ მოთამაშის მიმართ ინტერესი რეალური და დადასტურებულია, ზაფხულის სატრანსფერო ფანჯრის მოახლოებასთან ერთად კი მთავარ სამიზნეებზე უფრო მეტი ინფორმაცია გახდება ცნობილი.
და ბოლოს, შეტევა - განიხილება როგორც მარცხენა ვინგერის დამატება, ისე გამოკვეთილი ცხრიანისაც, თუმცა ამ მომენტისთვის ოლდ ტრაფორდის ბინადრების პოტენციურ სამიზნეებზე ახალს ვერაფერს გეტყვით, რადგან კლუბისთვის პრიორიტეტი დაცვისა და ნახევარდაცვის გაძლიერებაა, რის შემდეგაც მოხდება შეტევის დაკომპლექტება.
