დიდხნიანი პაუზის შემდეგ, მარკ-ანდრე ტერ შტეგენი მოედანზე დაბრუნებასთან ძალიან ახლოსაა. 33 წლის გერმანელმა მეკარემ გუნდთან ერთად ვარჯიში დაიწყო და უახლოეს ტურებში სამატჩო განაცხადშიც მოხვდება, თუმცა შეიძლება ეს ყველაფერი დროებითი იყოს და 2026 წლის დასაწყისში გამოცდილმა კარის დარაჯმა ბარსელონა დატოვოს.
კატალონიურ კლუბთან დაახლოებული წყაროების ინფორმაციით, ჰანსი ფლიკის პოზიცია უცვლელია და გუნდის #1 მეკარე კვლავ ჟოან გარსია იქნება, რაც იმას ნიშნავს, რომ მარკ-ანდრე ტერ შტეგენი ბარსელონაში თუ დარჩება, სეზონის ბოლომდე სკამზე ჯდომა მოუწევს, რაც მუნდიალის წინ მის გეგმებში წესით და რიგით არ უნდა შედიოდეს.
რამდენიმე გავლენიანი წყაროს ინფორმაციით, მარკ-ანდრე ტერ შტეგენის სიტუაციას ევროპული კლუბები ყურადრებით აკვირდებიან და ზამთრის სატრანსფერო ფანჯრის მოახლოებასთან ერთად მოსალოდნელია, რომ უფრო მეტადაც გააქტიურდებიან. შეგახსენებთ, ვეტერან გერმანელ კარის დარაჯს ბარსელონასთან არსებული კონტრაქტი 2028 წლამდე აკავშირებს, მისი სატრანსფერო ფასი კი დაახლოებით €10-15 მილიონია.
