რეალ მადრიდი, რომ ტრენტ ალექსანდერ-არნოლდით ინტერესდება, ამის შესახებ რამდენიმე თვის წინ უკვე გაცნობეთ. ინგლისელი ფეხბურთელი 2025 წელს თავისუფალი აგენტი ხდება და ამის შესახებ მადრიდში კარგად იციან. ამასობაში კი, მხარეებს შორის დაანონსებული პირველი კონტაქტი შედგა. გავლენიანი ესპანური გამოცემის
Relevo-ს ინფორმაციით, მადრიდული კლუბის წარმომადგენლები ინგლისელი ფეხბურთელის აგენტს დაუკავშირდნენ, სადაც მხარეებს შორის პოტენციურ ტრანსფერზე საუბარი შედგა. ახლა უკვე შეგვიძლია იმის თქმა, რომ სამეფო კლუბმა ფეხბურთელის ტრანსფერზე მუშაობა ოფიციალურად დაიწყო და უახლოეს პერიოდში ამ პოტენციურ გარიგებასთან დაკავშირებით უფრო მეტი ინფორმაცია გახდება ცნობილი.
ინგლისური პრესის ინფორმაციით, ლივერპული ტრენტ ალექსანდერ-არნოლდის შესანარჩუნებლად ყველაფერს გააკეთებს — მერსისაიდელები 25 წლის ფეხბურთელს ახალ კონტრაქტს უახლოეს პერიოდში შესთავაზებენენ, თუმცა ფაქტია ინგლისელი ფეხბურთელი ენფილდის დატოვებას სერიოზულად განიხილავს.
ტრენტი ლივერპულის აკადემიის აღზრდილია, 2016 წლიდან კი პირველი გუნდის ღირსებას იცავს. ინგლისელმა ამ დროში 318 შეხვედრაში მიიღო მონაწილეობა, გაიტანა 19 გოლი და 83 საგოლე გადაცემითაც მოამარაგა გუნდელები.
რეალ მადრიდი ალექსანდერ-არნოლდის გარდა, კიდევ ერთ ფეხბურთელს აკვირდება, კერძოდ ალფონსო დევისს, რომელიც 2025 წელს ასევე, თავისუფალი აგენტი ხდება.
