მეცის სპორტულმა დირექტორმა ფრედერიკ არპინონმა დღევანდელ პრესკონფერენციაზე გუნდის ახალწვეულების, გიორგი წიტაიშვილისა და გიორგი აბუაშილის შესახებ ისაუბრა.
"გიორგი წიტაიშვილი ტექნიკურად ძალიან კარგი მოთამაშეა და გვიხარია, რომ ის ჩვენთან ერთადაა. წინა სეზონში მან შვიდი გოლი გაიტანა, რაც შთამბეჭდავი სტატისტიკაა. გიორგი იმ პოზიციაზე თამაშობს, რომლის გაძლიერებაც გვჭირდებოდა - მარჯვენა ფლანგზე. ჩვენ ხშირად ვაკვირდებით საქართველოს ნაკრებს და იქ მოთამაშე ფეხბურთელებს. მათ ისეთი მენტალიტეტი აქვთ, როგორიც ჩვენს კლუბს.როგორც ვიცით, გიორგი მიქაუტაძემ დიდი გავლენა მოახდინა წიტაიშვილის არჩევანზე.
რაც შეეხება გიორგი აბუაშილს, ის ახალგაზრდა და დიდი პერსპექტივის მქონე ფეხბურთელია, რომელიც ახლახან აღმოვაჩინეთ. მისი სათამაშო თვისებები ძალიან მოგვეწონა. თანამემამულის მსგავსად, ისიც ფლანგზე თამაშობს. გიორგი ჩვენთან იჯარით გადმოვიდა, შემდგომში გამოსყიდვის უფლებით. ჩვენ მისი შესაძლებლობების გვჯერა, როგორც ამ სეზონში, ისე მომავალშიც."
ახალ გუნდში გადასვლის შემდეგ, მეცის არხთან ქართველმა ფეხბურთელებმაც ისაუბრეს.
გიორგი წიტაიშვილი: "ძალიან ბედნიერი ვარ აქ ყოფნით.სასიამოვნოდ გაკვირვებული დავრჩი კლუბის ყველა წევრის მიერ გაწეული მუშაობითა და ზოგადად ინფრასტრუქტურით. იგრძნობა, რომ ეს ერთი დიდი ოჯახია და ყველაფერი იმისთვის კეთდება, რომ თავი კარგად ვიგრძნო. მოუთმენლად ველი სეზონის დაწყებას და ლიგა 1-ში დებიუტს. კარგად ვიცი, თუ როგორ აფასებენ მეცში ქართველ ფეხბურთელებს."
გიორგი აბუაშვილი: "მეცში გიორგი მიქაუტაძეს, რომ ძალიან წარმატებული სეზონები ჰქონდა, კარგად ვიცოდი, მაგრამ პირველ რიგში ჩემს გადაწყვეტილებაზე დიდი გავლენა გიორგი წიტაიშვილმა მოახდინა. ჩვენ ყველაფერს გავაკეთებთ, რომ გიორგი მიქაუტაძის მემკვიდრებოდა წარმატებულად გავაგრძელოთ. მადლობა მეცის ხელმძღვანელობას გამოცხადებული ნდობისთვის."
