რამდენიმეკვირიანი მოლაპარაკებები დასრულდა, ტეო ერნანდესი მილანიდან კარიერას ალ ჰილალში გააგრძელებს! მხარეებმა გარიგების ყველა დეტალი შეათანხმეს, ფრანგ განაპირა მცველს საუდიში უკვე ელოდებან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. მილანი ფეხბურთელის სანაცვლოდ €25 მილიონს მიიღებს, ხოლო თავად ფრანგის წლიური ანაზღაურება €20 მილიონამდე იქნება.
ალ ჰილალი, რომ ტეო ერნანდესის გარიგებაზე მუშაობდა, ამის შესახებ რამდენიმე კვირის წინ უკვე გაცნობეთ. მილანი და ფრანგი ფეხბურთელი ახალ კონტრაქტზე დაახლოებით წელიწადნახევარი მუშაობდნენ, თუმცა ამის მიუხედავად შეთანხმება ვერ მოხერხდა, შესაბამისად, იტალიურმა გრანდმა ფეხბურთელის გაყიდვა გადაწყვიტა. საქმეში იყო ატლეტიკო მადრიდიც, თუმცა ესპანურმა კლუბმა მილანის მიერ მოთხოვნილი სატრანსფერო თანხა არ გადაიხადა, სწორედ ამიტომ გარიგება ჩაიშალა.
ტეო ერნანდესი მილანის ღირსებას 2019 წლიდან მოყოლებული იცავდა. ფრანგმა ფეხბურთელმა ამ დროში 262 მატჩის ჩატარება მოასწრო, გაიტანა 34 გოლი და 45 საგოლე გადაცემითაც გამოიჩინა თავი. ტეომ "როსონერისთან" ერთად ორი ტიტულის მოგებაც მოახერხა. თუ ყველაფერი გეგმის მიხედვით წავა, ალ ჰილალი ტეო ერნანდესის ტრანსფერს მიმდინარე კვირის ბოლომდე დაადასტურებს.
