გავლენიანი ესპანური გამოცემები საკმაოდ საინტერესო ინფორმაციას ავრცელებენ — როგორც ირკვევა, ბარსელონა ზაფხულში რამდენიმე დიდ გაყიდვას გეგმავს, რაც იმას ნიშნავს, რომ არსებული შემადგენლობა მომდევნო სეზონის წინ გადახალისდება.
რამდენიმე კვირის წინ როგორც გაცნობეთ, ალეხანდრო ბალდე ხელშეუხებელთა სიაში ნამდვილად არაა, დღეს კი ცნობილი ხდება, რომ ჟიულ კუნდეს მომავალიც გაურკვეველია. დიახ, ზემოხსენებულ წყაროებს თუ დავუჯერებთ, თუ რომელიმე კლუბი სოლიდურ შეთავაზებას გააკეთებს, ბარსელონა ფრანგ მცველს 99% გაყიდის!
ეს ინფორმაცია ბევრისთვის საკმაოდ მოულოდნელი აღმოჩნდა, თუმცა როგორც ჩანს ბარსელონაში ყველა მოთამაშე ხელშეუხებელი ნამდვილად არაა. ახლა კი დაინტერესებულ კლუბებზეც მოგიყვებით — ესპანურ წყაროებს თუ დავუჯერებთ, ჟიულ კუნდეთი ძირითადად პრემიერ ლიგის წარმომადგენლები ინტერესდებიან, კერძოდ მანჩესტერ სიტი, ჩელსი და ლივერპული. ამ მომენტისთვის ბოლომდე დაზუსტებული არაა რამდენად რეალურია ამ კლუბების ინტერესი, თუმცა ერთი რამ ფაქტია, ფრანგმა ფეხბურთელმა შესაძლოა ახალი სეზონი, ახალ გუნდში დაიწყოს.
ჟიულ კუნდეს ბარსელონასთან არსებული კონტრაქტი 2030 წლამდე აკავშირებს, მისი სატრანსფერო ფასი კი დაახლოებით €60/70 მილიონია. ზაფხულის სატრანსფერო ფანჯრის მოახლოებასთან ერთად, 27 წლის ფრანგი ფეხბურთელის თაობაზე უფრო მეტი ინფორმაცია გახდება ცნობილი.
