ვიქტორ გიოკერეში ყველას გაოცებას აგრძელებს — შვედი ფორვარდის ანგარიშზე ამ სეზონში უკვე 47 გატანილი გოლი და 11 საგოლე გადაცემაა. ასეთი გიჟური სტატისტიკის ფონზე, ლოგიკურია, რომ ფეხბურთელის მიმართ ინტერესი ყოველდღიურად იზრდება. სპორტინგში იმ ფაქტს ყველა შეეგუა, რომ სეზონის ბოლოს 26 წლის ფორვარდი გუნდს 100% დატოვებს.
არსენალი, ჩელსი, მანჩესტერ იუნაიტედი, ლივერპული, ტოტენჰემი, ბარსელონა, ბაიერნი, პსჟ... დიახ, ყველა ამ კლუბის ინტერესი რეალური და დადასტურებულია. მეტიც, ყველაზე მეტად "მეთოფეები" აქტიურობენ. არსენალის ახალი სპორტული დირექტორი ანდრეა ბერტა გიოკერეშის ტრანსფერზე უკვე რამდენიმე კვირაა მუშაობს.
შვედი ფორვარდის კონტრაქტში გამოსასყიდი თანხა €100 მილიონი წერია, თუმცა სპორტინგსა და ფეხბურთელს შორის სიტყვიერი შეთანხმება არსებობს, რომლის მიხედვითაც, თუ რომელიმე კლუბი დაახლოებით €65-70 მილიონს გადაიხდის, პორტუგალიური კლუბი გიოკერეშს ტრანსფერში ხელს არ შეუშლის.
ზაფხულის სატრანსფერო ფანჯრის მოახლოებასთან ერთად, მოსალოდნელია, რომ ვიქტორ გიოკერეშით კიდევ უფრო მეტი კლუბი დაინტერესდება.
