ევროტურნირების დაწყებამდე რამდენიმე დღით ადრე, ქუთაისის ტორპედო გაძლიერებას განაგრძობს და კლუბმა 2 ტრანსფერი განახორციელა.
LaGazzetta.ge-ს ინფორმაციით, დღეს ტორპედომ დუკლადან პორტუგალიელი მარცხენა მცველი ჟორჟინიო დაიმატა. 27 წლის ჟორჟინიომ კარიერა ბენფიკაში დაიწყო, სადაც ასაკობრივ გუნდებში 8 წელი დაჰყო. თამაშობდა პორტუგალიურ კოვილაში, ფინურ ილვესში, ბოლოს კი პრაღის დუკლაში გამოდიოდა.
კლუბის ოფიციალური გვერდის ცნობით, ქუთაისელებმა 30 წლის სერბი თავდამსხმელი კომნენ ანდრიჩი ტორპედოს ღირსებას დაიცავს.
კარიერას ის სერბულ რადნიცკში იწყებდა. 2016 წელს პორტუგალიურ ბელენენსიში გადავიდა. 3 წლის შემდეგ დინამო ზაგრების მაისური მოირგო, სამჯერ გახდა ხორვატიის ჩემპიონი, ერთხელ - თასის მფლობელი. 2022 წელს კომნენი საფრანგეთის ლიგა 1-ს წარმომადგენელ კლერმონში გადავიდა და ამ გუნდის მაისურით 41 მატჩი ჩაატარა, რის შემდეგაც კარიერა ისევ ხორვატიაში, კერძოდ რიეკაში გააგრძელა. ტორპედოს სერბი ფეხბურთელი 1-წლიანი იჯარით სწორედ "რიეკადან" შეუერთდა. იჯარის დასრულების შემდეგ ის 2 წლით ტორპედოს სრულფასოვანი წევრი იქნება.
როგორც ჩვენთვის არის ცნობილი, ორივე მათგანმა სამედიცინო შემოწმება თბილისში, ნიუ ვიჟენ საუნივერსიტეტო ჰოსპიტალში დღეს გაიარა და ხვალიდან გუნდს შეუერთდებიან.
შეგახსენებთ, რომ ტორპედო კონფერენს ლიგის საკვალიფიკაციო ეტაპის მატჩს 10 ივლისს, შინ ორდაბასის წინააღმდეგ გამართავს.
