შეგახსენებთ, იტალიელ მწვრთნელსა და ფეხბურთელს შორის კონფლიქტი მას შემდეგ წარმოიშვა, რაც გასპერინიმ ლუკმენს ერთ-ერთი ყველაზე ცუდი პენალტის შემსრულებელი უწოდა. ამას ნიგერიელი ფორვარდის ოფიციალური განცხადებაც მოჰყვა, რის შემდეგაც კიდევ ერთხელ დადასტურდა, რომ ფეხბურთელი სეზონის ბოლოს გუნდს დატოვებდა.
ნიგერიელ ფორვარდს ატალანტას დატოვება 2024 წლის ზაფხულშიც სურდა, თუმცა მაშინ ფეხბურთელი გუნდში დარჩა. სერია ა-ს ერთ-ერთი გამორჩეული შემტევის სიტუაციას ყურადღებით აკვირდებიან იტალიური გუნდები, კერძოდ, იუვენტუსი და ნაპოლი. "ბიანკონერისა" და "პარტენოპეის" ინტერესი დადასტურდა, თუმცა ზაფხულის მოახლოებასთან ერთად, მოსალოდნელია სხვა კლუბების გააქტიურებაც.
ადემოლა ლუკმენი ატალანტას ღირსებას 2022 წლიდან მოყოლებული იცავს. ამ დროში ნიგერიელმა ფეხბურთელმა 107 მატჩის ჩატარება მოასწრო, გაიტანა 49 გოლი და 23 საგოლე გადაცემითაც გამოიჩინა თავი. ბერგამოული კლუბი ფეხბურთელს, დაახლოებით, €35-40 მილიონად აფასებს.
