ტრანსფერი დაიხურა, ადემოლა ლუკმენი ატალანტადან კარიერას ატლეტიკო მადრიდში გააგრძელებს! მხარეებმა გარიგების ყველა დეტალი შეათანხმეს, 28 წლის ფეხბურთელს ესპანეთში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. ატლეტიკო მადრიდი ადემოლა ლუკმენის სანაცვლოდ დაახლოებით €40 მილიონს გადაიხდის.
ადემოლა ლუკმენს, რომ ატალანტას დატოვება სურდა ამის შესახებ ყველასთვის კარგად იყო ცნობილი. ნიგერიელი ფეხბურთელი სხვა კლუბში გადასვლას მიმდინარე სეზონის დაწყებამდეც ცდილობდა, თუმცა ბერგამოულმა კლუბმა ზაფხულში ყველა შეთავაზება დაბლოკა და ლუკმენიც გუნდში დარჩა. შემდეგ კი საქმეში ატლეტიკო მადრიდი გამოჩნდა, რომელმაც საკმაოდ სოლიდური შეთავაზება გააკეთა და ტრანსფერიც დაიხურა.
ადემოლა ლუკმენი ატალანტას ღირსებას 2022 წლიდან მოყოლებული იცავდა. ნიგერიელმა შემტევმა ამ დროში 137 მატჩის ჩატარება მოასწრო, გაიტანა 55 გოლი და 27 საგოლე გადაცემითაც გამოიჩინა თავი.
