გავლენიანი ესპანური გამოცემების ინფორმაციით, ბოლო მომენტში რაიმე გაუთვალისწინებელი თუ არ მოხდა, რობერტ ლევანდოვსკი სეზონის ბოლოს ბარსელონას თავისუფალი აგენტის სტატუსით დატოვებს. როგორც იწერება, ეს გადაწყვეტილება თითქმის საბოლოოა და დიდი ალბათობით აღარ შეიცვლება.
იმის მიუხედავად, რომ რობერტ ლევანდოვსკის ბარსელონაში დარჩენის სურვილი აქვს, კლუბში ფიქრობენ, რომ 37 წლის ფეხბურთელისთვის ახალი კონტრაქტის შეთავაზება სწორი ნაბიჯი არ იქნება და სჯობს ფინანსები თავიდან ბოლომდე ახალი ფორვარდის დამატებას მოხმარდეს.
რობერტ ლევანდოვსკი ბარსელონას ღირსებას 2022 წლიდან მოყოლებული იცავს. პოლონელმა გოლეადორმა ამ დროში 156 მატჩის ჩატარება მოასწრო, გაიტანა 105 გოლი და 20 საგოლე გადაცემითაც გამოიჩინა თავი. 37 წლის ფეხბურთელის სიტუაციას ევროპული, ამერიკული და საუდის კლუბები ყურადღებით აკვირდებიან.
