იბრაჰიმა კონატე და ლივერპული ახალ კონტრაქტზე ამ დრომდე ვერ თანხმდებიან. იმის მიუხედავად, რომ მხარეებმა ახალ ხელშეკრულებაზე მუშაობა გასულ წელს დაიწყეს, მერსისაიდული კლუბი ფრანგი ცენტრალური მცველის მოთხოვნებს ამ დრომდე ვერ აკმაყოფილებს. სწორედ ამიტომ, ბრიტანული მედია 25 წლის ფეხბურთელის პოტენციურ წასვლაზე ალაპარაკდა.
დადასტურებულად შეგვიძლია იმის თქმა, რომ რეალ მადრიდი და პსჟ იბრაჰიმა კონატეთი სერიოზულად ინტერესდებიან. ორივე კლუბი ახალ ცენტრალურ მცველს ეძებს, ფრანგი ფეხბურთელის კანდიდატურა კი ორივესთვის მისაღებია. რეალ მადრიდში ორ ვარიანტს განიხილავენ: სატრანსფერო თანხის შეთავაზება და ტრანსფერის ახლავე დახურვა ან ერთი წლით მოცდა და კონატეს უფასოდ დამატება. რაც შეეხება პსჟ-ს, ლუიშ კამპუში სიტუაციას ყურადღებით აკვირდება და თუ შესაძლებლობა გაჩნდება, პარიზელები პირველ შეთავაზებასაც გააკეთებენ.
იბრაჰიმა კონატეს ლივერპულში დარჩენა სურს, თუმცა ახალ კონტრაქტს მხოლოდ იმ შემთხვევაში გააფორმებს თუ მის მოთხოვნეს კლუბი დააკმაყოფილებს. შეგახსნებეთ, ფრანგს კლუბთან არსებული კონტრაქტი 2026 წლამდე აკავშირებს. უახლოეს კვირებში კონატეს თაობაზე უფრო მეტი ინფორმაცია გახდება ცნობილი.
