პარი სენ-ჟერმენში ახალი სეზონისთვის მზადებას აქტიურად აგრძელებენ. იმის მიუხედავად, რომ სატრანსფერო ფანჯრის გახსნიდან ერთ თვეზე მეტია უკვე გასული, პარიზულ კლუბს ერთი ტანსფერიც კი არ განუხორციელებია, შესაბამისად, აგვისტო ლუის ენრიკეს გუნდისთვის საკმაოდ დატვირთული იქნება.
ბოლო საათებში გავრცელებული ინფორმაციის თანახმად, პსჟ ორ ახალ ტრანსფერს უახლოვდება — საუბარია ლუკას შევალიესა და ილია ზაბარნიზე!
პსჟ, რომ ლუკას შევალიეს ტრანსფერზე მუშაობდა, ამის შესახებ რამდენიმე საათის წინ გაცნობეთ. პარიზული კლუბი და ლილი გარიგების ბოლო დეტალებს უახლოეს საათებში მოაგვარებენ, რის შემდეგაც 23 წლის ფრანგი მეკარე ახალ კლუბში სამედიცინო შემოწმებას გაივლის და კონტრაქტს ხელს მოაწერს. მხარეები დაახლოებით €40-45 მილიონიან გარიგებაზე მუშაობენ.
ეს ტრანსფერი თავიდან ბოლომდე ჯანლუიჯი დონარუმასთან არის დაკავშირებული. პარიზული კლუბი და იტალიელი მეკარე ახალ კონტრაქტზე ამ დრომდე ვერ თანხმდებიან, სწორედ ამიტომ, ლუიშ კამპუშმა ლუკას შევალიეს ტრანსფერის დახურვა გადაწყვიტა.
რაც შეეხება ილია ზაბარნის, პარი სენ-ჟერმენი უკრაინელი მცველის ტრანსფერზე დაახლოებით ერთი თვეა, რაც მუშაობს. ბოლო მომენტში რაიმე გაუთვალისწინებელი თუ არ მოხდა, პსჟ 22 წლის ფეხბურთელის გარიგებას მიმდინარე კვირაში დახურავს.
პსჟ და ბორნმუთი დაახლოებით €60-70 მილიონიან გარიგებაზე მუშაობენ. ილია ზაბარნისთვის 5-წლიანი კონტრაქტი უკვე გამზადებულია და თუ ყველაფერი გეგმის მიხედვით წავა, უკრაინელი ცენტრალური მცველი პსჟ-ს ახალი ფეხბურთელი აგვისტოს დასაწყისში გახდება.
