ზაფხულის სატრანსფერო ფანჯრის დახურვამდე რამდენიმე საათით ადრე, ალექსანდერ ისაკის საგა დასრულდა — შვედი გოლეადორი ნიუკასლიდან კარიერას ლივერპულში გააგრძელებს! მხარეებმა გარიგების ყველა დეტალი შეათანხმეს, 25 წლის ფორვარდს ახალ კლუბში უკვე ელოდებიან, სადაც სამედიცინო შემოწმებას გაივლის და კონტრაქტს ხელს მოაწერს. მერსისაიდული კლუბი ალექსანდერ ისაკის სანაცვლოდ დაახლოებით £125 მილიონს გადაიხდის!
ლივერპული ალექსანდერ ისაკის ტრანსფერზე ორი თვის განმავლობაში მუშაობდა. იმის მიუხედავად, რომ ნიუკასლი შვედის გაშვებას არ გეგმავდა, ბევრი ბრძოლისა და მოლაპარაკებების შემდეგ, "კაჭკაჭები" დათმობაზე წავიდნენ და ალექსანდერ ისაკის ტრანსფერს დათანხმდნენ.
ალექსანდერ ისაკი ნიუკასლის ღირსებას 2022 წლიდან მოყოლებული იცავდა. შვედმა ფორვარდმა ამ დროში 109 მატჩის ჩატარება მოასწრო, გაიტანა 62 გოლი და 11 საგოლე გადაცემითაც გამოიჩინა თავი. ლივერპული 25 წლის ფეხბურთელს უახლოეს საათებში ოფიციალურად წარადგენს.
