გავლენიანი იტალიური გამოცემების ინფორმაციით, ბოლო მომენტში რაიმე გაუთვალისწინებელი თუ არ მოხდა, დენზელ დუმფრისი მიმდინარე სეზონის ბოლოს ინტერს დატოვებს. მიზეზი? ნიდერლანდელ განაპირა მცველს კონტრაქტში გამოსასყიდი თანხა €25 მილიონი უწერია, რაც ასეთი დონის ფეხბურთელისთვის ძალიან დაბალი თანხაა. ამ ყველაფერს ასევე ემატება აგენტის შეცვლაც, რაც როგორც წესი მოახლოებულ ტრანსფერს ნიშნავს ხოლმე.
შეგახსენებთ, დენზელ დუმფრისი ინტერის დატოვებას 2024 წლის ზაფხულშიც განიხილავდა, თუმცა მაშინ მხარეებმა თანამშრომლობის გაგრძელება არჩიეს და არსებული კონტრაქტიც გახანგრძლივდა, თუმცა, ნიდერლანდელის ახალ ხელშეკრულებაში, რომ ასეთი დაბალი გამოსასყიდი თანხა ჩაიწერა, სულ ახლახანს გახდა ცნობილი. როგორც ირკვევა, ამ პუნქტის ჩაწერა თავად დენზელ დუმფრისმა მოითხოვა, რასაც ბეპე მაროტა დათანხმდა.
დენზელ დუმფრისი ინტერის ღირსებას 2021 წლიდან მოყოლებული იცავს. ნიდერლანდელმა ამ დროში 194 მატჩის ჩატარება მოასწრო, გაიტანა 25 გოლი და 26 საგოლე გადაცემითაც გამოიჩინა თავი. როგორც ჩანს, სერია A-ს ერთ-ერთი გამორჩეული განაპირა მცველი "ნერაძურიში" ბოლო სეზონს ატარებს, მომავალ წელს კი 29 წლის ფეხბურთელს სხვა კლუბში ვიხილავთ.
