იმის მიუხედავად, რომ ზაფხულის სატრანსფერო ფანჯრის დროს ბორნმუთი რამდენიმე ლიდერმა დატოვა, "ალუბლები" ახალ სეზონში მაინც სანახაობრივ ფეხბურთს აჩვენებენ და ერთ-ერთ ანგარიშგასაწევ გუნდად ითვლებიან.
ბორნმუთი, რომ კარგ ფეხბურთს აჩვენებს ეს დიდწილად ანტუან სემენიოს დამსახურებაა, რომელიც გუნდის უდავო ლიდერია. 25 წლის განელი ფეხბურთელის ანგარიშზე ამ სეზონში 6 გოლი და 3 საგოლე გადაცემაა, რაც შთამბეჭდავი სტატისტიკაა.
განელი შემტევის კარგ თამაშს ყურადღებით აკვირდებიან ტოპ კლუბები და როგორც ადგილობრივი ბრიტანული მედია წერს, ანტუან სემენიო ბორნმუთს 2026 წელს აუცილებლად დატოვებს და ეს შეიძლება ზამთრის სატრანსფერო ფანჯრის დროსაც კი მოხდეს.
ლივერპული, მანჩესტერ სიტი, ჩელსი და ტოტენჰემი — ოთხივე კლუბის ინტერესი რეალური და დადასტურებულია, მეტიც, დიდი შანსია ამ გუნდებმა განელი ფეხბურთელის დამატება იანვარშივე მოინდომონ. უახლოეს კვირებში, ანტუან სემენიოს თაობაზე უფრო მეტი ინფორმაცია გახდება ცნობილი. მოსალოდნელია სხვა კლუბების გააქტიურებაც.
