გავლენიანი იტალიელი ჟურნალისტები საკმაოდ საინტერესო ინფორმაციას ავრცელებენ — მიმდინარე სეზონის დასრულებამდე ჰაკან ჩალჰანოღლუ და ინტერი ახალ კონტრაქტზე შეთანხმებას თუ ვერ მიაღწევენ, ზაფხულში მილანური კლუბი 32 წლის ცენტრალური ნახევარმცველის სანაცვლოდ ყველა შეთავაზებას განიხილავს!
იტალიურ კლუბში დიდი ცვლილებები დაანონსდა, რაც იმას ნიშნავს, რომ ზაფხულში გუნდს რამდენიმე ფეხბურთელი დატოვებს და დიდი შანსია ამ სიაში თურქი ფეხბურთელიც მოხვდეს. იმის მიუხედავად, რომ ჰაკან ჩალჰანოღლუ კრისტიან კივუსთვის ხელშეუხებელია, ყველაფერი მაინც ახალ კონტრაქტზე იქნება დამოკიდებული. შეგახსენებთ, ჰაკან ჩალჰანოღლუს "ნერაძუირსთან" არსებული ხელშეკრულება 2027 წლამდე აკავშირებს.
ინფორმაციისთვის იმასაც გეტყვით, რომ გასულ ზაფხულს ჰაკან ჩალჰანოღლუს დამატებას როგორც გალათასარაი, ისე ფენერბაჰჩეც ცდილობდა, თუმცა თურქმა სამშობლოში დაბრუნებაზე უარი განაცხადა და ინტერში დარჩა. შემდეგ იყო მოლოდინი, რომ მხარეები ახალ ხელშეკრულებას გასულ წელსვე გააფორმებდნენ, თუმცა როგორც ჩანს მოლაპარაკებები ჩიხში შევიდა. ზაფხულის სატრანსფერო ფანჯრის მოახლოებასთან ერთად, ჰაკან ჩალჰანოღლუს თაობაზე უფრო მეტი ინფორმაცია გახდება ცნობილი.
