არსენალში ახალი სეზონისთვის მზადებას უკვე შეუდგნენ. "მეთოფეები" ზაფხულში რამდენიმე პოზიციის გაძლიერებას გეგმავს. როგორც ბრიტანულ პრესაში იწერება, განიხილება დაახლოებით 5-6 ტრანსფერის გაკეთება.
კლუბის სპორტული დირექტორი ანდრეა ბერტა საქმეს უკვე შეუდგა და როგორც ირკვევა, არსენალმა 2025/26 სეზონის პირველი ტრანსფერი უკვე დახურა. საუბარია მარტინ ზუბიმენდიზე, რომელიც რეალ სოსიედადიდან კარიერას ინგლისურ კლუბში გააგრძელებს. არსენალი ფეხბურთელის კონტრაქტში ჩაწერილ გამოსასყიდ თანხას €60 მილიონს უახლოეს პერიოდში გააქტიურებს! 26 წლის ესპანელი ნახევარმცველი ახალ კლუბთან მინიმუმ 5-წლიან ხელშეკრულებას გააფორმებს.
მარტინ ზუბიმენდი რეალ სოსიედადის აკადემიის აღზრდილია, 2020 წლიდან კი პირველ გუნდში თამაშობს. ფეხბურთელმა ბასკური გუნდის მაისურით ჯამში 232 მატჩი ჩაატარა, გაიტანა 10 გოლი და 9 საგოლე გადაცემითაც გამოიჩინა თავი. 26 წლის ნახევარმცველი ესპანეთის ეროვნული ნაკრების წევრიცაა.
ესპანელის ტრანსფერით რეალ მადრიდი და ლივერპულიც ინტერესდებოდნენ, თუმცა ფეხბურთელს მხოლოდ არსენალში სურდა კარიერის გაგრძელება. მარტინ ზუბიმენდი ახალ კლუბს 1 ივლისს შეუერთება და 2025/26 სეზონს "მეთოფეებში" დაიწყებს.
