მიმდინარე სეზონი როგორც არ უნდა დასრულდეს, ზაფხულში, მილანში დიდი ცვლილებები მაინც მოხდება. კლუბთან დაახლოებულ წყაროებს თუ დავუჯერებთ, "როსონერის" საკმაოდ ბევრი ფეხბურთელი დატოვებს, რაც იმას ნიშნავს, რომ სან სიროს ბინადრებს წინ საკმაოდ დატვირთული ზაფხულის სატრანსფერო ფანჯარა ელოდებათ.
"რაფაელ ლეაო, კრისტიან პულისიკი, სანტიაგო ხიმენესი და კრისტოფერ ნკუნკუ — ასე გაგრძელება შეუძლებელია".
იტალიურ პრესას თუ დავუჯერებთ, მილანი ამ ფეხბურთელების სანაცვლოდ ყველა შეთავაზებას განიხილავს, რაც იმას ნიშნავს, რომ მომდევნო სეზონში დიდი შანსია ეს შემტევები "როსონერიში" აღარ ირიცხებოდნენ. როგორც იწერება ეს გადაწყვეტილება საბოლოოა და გადახედვას აღარ ექვემდებარება.
რაც შეეხება ნიკლას ფიულკრუგს, "როსონერი" გერმანელ ფორვარდს ვესტ ჰემიდან არ გამოისყიდის, რაც იმას ნიშნავს, რომ 33 წლის ფეხბურთელი ზაფხულში მილანურ გრანდს აუცილებლად დატოვებს.
ზემოხსენებული გადაწყვეტილების შემდეგ მოსალოდნელია, რომ მომდევნო სეზონში სრულიად სახეშეცვლილ მილანს ვიხილავთ და ეს განსაკუთრებით გუნდის შეტევით ხაზს შეეხება. ზაფხულის სატრანსფერო ფანჯრის მოახლოებასთან ერთად კი "როსონერის" პოტენციურ სამიზნეებზე უფრო მეტი ინფორმაცია გახდება ცნობილი.
