რაც შეეხება მანუელ ნოიერს, მსოფლიოს ერთ-ერთი ყველაზე გამორჩეული მეკარე, არც სანაკრებო კარიერის დასრულებას აპირებს და საკლუბო კარიერის გაგრძელებასაც გეგმავს. 38 წლის მეკარეს, ბაიერნთან კონტრაქტი 2025 წლამდე აკავშირებს და იმის მიუხედავად, რომ პრესა მანუს შესაძლო წასვლის შესახებ ალაპარაკდა, ამ მომენტისთვის გერმანელი კიპერი ბაიერნში დარჩენასთან უფრო ახლოს არის, ვიდრე დატოვებასთან.
რაც შეეხება გიორგი მამარდაშვილს, ქართველი მეკარე 2023 წლის ზაფხულის სატრანსფერო ფანჯრის დროს ბაიერნში გადასვლასთან, რომ ახლოს იყო, ეს თავად ფეხბურთელმაც დაადასტურა, თუმცა მაშინ ნოიერმა გეგმები თავიდან ბოლომდე არია. როდესაც ყველა ფიქრობდა, რომ უმძიმესი ტრავმის შემდეგ ვეტერანი კიპერი კარიერას დაასრულებდა ან როგორც მინიმუმ მეორე ნომრობაზე დათანხმდებოდა, მანუმ დარჩენა და პირველობისთვის ბრძოლა გადაწყვიტა, რამაც მამარდაშვილის ტრანსფერი დაბლოკა.
"ბაიერნს მსოფლიოში საუკეთესო მეკარე ჰყავს, შესაბამისად, ამ გუნდში გადასვლა შეუძლებელია. ბაიერნში მხოლოდ იმ შემთხვევაში გადავალ, თუ ვითამაშებ და #1 ნომერი ვიქნები, სხვა შემთხვევაში, ტრანსფერი გამორიცხულია", - გიორგი მამარდაშვილი Sky Sport Germany-სთან.
ეს კომენტარი 23 წლის მეკარემ 1 ივლისს გააკეთა, მას შემდეგ კი სიტუაცია არ შეცვლილა. ბაიერნი არ აპირებს ახალი მეკარის ყიდვას თუ ნოიერი დარჩენას გადაწყვეტს. მამარდაშვილის ფასი €35 მილიონზე მეტია, გერმანული გრანდი კი მეორე ნომერში ამხელა თანხას არ გადაიხდის. ამას ისიც ემატება, რომ "რეკორდმაისტერის" საკუთრებაში ჯერ კიდევ რჩება ალექსანდერ ნიუბელი, რომელიც იჯარის წესით შტუტგარტში თამაშობს, შესაბამისად, კომპანის გუნდი ახალი მეკარის ყიდვაზე ამ მომენტისთვის ნაკლებად ფიქრობს.
სატრანსფერო ფანჯარა სულ ახლახანს გაიხსნა, შესაბამისად, უახლოეს პერიოდში სიტუაცია თუ შეიცვლება, LaGazzetta.ge ყველაზე სწრაფად მოგაწყვდით გადამოწმებულ ინფორმაციას.
