ჰაკან ჩალჰანოღლუს სიტუაცია უცვლელია — თურქ ფეხბურთელს ინტერის დატოვება კვლავ სურს! იმის მიუხედავად, რომ გალათასარაიში მისი ტრანსფერი ჩაიშალა, 31 წლის ნახევარმცველი იმედოვნებს, რომ ზაფხულის სატრანსფერო ფანჯრის დახურვამდე სხვა გუნდში მაინც გადაბარგდება.
ბოლო საათებში გავრცელებული ინფორმაციის თანახმად, ჰაკან ჩალჰანოღლუს ტრანსფერზე ფენერბაჰჩე მუშაობს! დიახ, გალათასარაიში ჩაშლილი გარიგების შემდეგ, ფეხბურთელის დამატებას მეორე თურქული გრანდი ცდილობს. ჟოზე მოურინიოს გუნდი პირველ ოფიციალურ შეთავაზებას ამზადებს. როგორც ირკვევა, ჩალჰანოღლუ ფენერბაჰჩეში თამაშს სერიოზულად განიხილავს.
ინტერის პოზიცია ცნობილია — თუ რომელიმე კლუბი მათ მიერ მოთხოვნილ თანხას გადაიხდის, კლუბი ფეხბურთელის ტრანსფერს არ დაბლოკავს. როგორც იტალიურ პრესაში იწერება, მილანური გრანდი გამოცდილ ნახევარმცველს დაახლოებით €25-30 მილიონად აფასებს.
ჰაკან ჩალჰანოღლუს პოტენციურ ტრანსფერთან დაკავშირებით უახლოეს დღეებში უფრო მეტი ინფორმაცია გახდება ცნობილი. თურქი ფეხბურთელის სიტუაციას სხვა კლუბებიც ყურადღებით აკვირდებიან. ისიც აუცილებლად უნდა ითქვას, რომ ჩალჰანოღლუს ინტერში დარჩენა გამორიცხული არაა.
