რედ ბულის გუნდი 27 ტურის შემდეგ, 42 ქულით, მე-6 პოზიციაზე იმყოფება. მომდევნო სეზონში გუნდი ჩემპიონთა ლიგაზე გასვლას თუ ვერ მოახერხებს, ლაიფციგს ლიდერები დატოვებენ — პირველ რიგში ბენჟამინ შეშკო წავა, რომლის დამატებასაც ტოპ კლუბები უკვე ცდილობენ, შემდეგი კი დიდი შანსია ჩავი სიმონსი იყოს.
21 წლის ნიდერლანდელი ფეხბურთელით პრემიერ ლიგის ტოპ კლუბები ინტერესდებიან — ლივერპული, მანჩესტერ იუნაიტედი, არსენალი და ჩელსი! დიახ, ოთხივე გუნდის ინტერესი რეალური და დადასტურებულია. საქმეშია ბუნდესლიგის ბინადარი ბაიერნიც! ლაიფციგი ჩავი სიმონსს დაახლოებით €65-70 მილიონად აფასებს, რაც ზემოთ ხსენებული კლუბებისთვის საკმაოდ მისაღები თანხაა. ნიდერლანდელი ფეხბურთელი სეზონის ბოლოს გუნდის გამოცვლაზე სერიოზულად ფიქრობს.
ნიდერლანდელი ფეხბურთელი გერმანული კლუბის ღირსებას 2023 წლიდან მოყოლებული იცავს. სიმონსმა ამ დროში 69 მატჩის ჩატარება მოასწრო, გაიტანა 18 გოლი და 19 საგოლე გადაცემაც შეასრულა.
ზაფხულის სატრანსფერო ფანჯრის მოახლოებასთან ერთად, ჩავი სიმონსის თაობაზე უფრო მეტი ინფორმაცია გახდება ცნობილი. მოსალოდნელია სხვა ტოპ კლუბების გააქტიურებაც.
