ბოლო წლებთან შედარებით, იტალიურ კლუბებს სოლიდური ზაფხულის სატრანსფერო ფანჯარა ჰქონდათ. ტოპ კლუბებმა საკმაოდ დიდი თანხა დახარჯეს და ახალი სეზონის წინ, სერიოზული შევსებაც მიიღეს. ამ სიაში მოხვდა ინტერიც, რომელმაც €100 მილიონამდე დახარჯა, თანაც ეს ყველაფერი ისე გააკეთა, რომ გუნდის ლიდერები შეინარჩუნა.
"ნერაძურიმ" ზაფხულში 5 ახალი ფეხბურთელი დაიმატა, საიდანაც თამამად შეგვიძლია იმის თქმა, რომ ორმა მოთამაშემ ვერ გაამართლა. ლუის ენრიკე და ენდი დიუფი ყველაზე ცუდი ტრანსფერების კატეგორიაში უკვე მოხვდნენ, რასაც დიდი ალბათობით ლოგიკური გაგრძელება მოჰყვება — ინტერი ზამთრის სატრანსფერო ფანჯრის დროს ბრაზილიელი ვინგერის გაყიდვას შეეცდება, ხოლო რაც შეეხება ახალგაზრდა ფრანგს, დიდი ალბათობით ისიც დატოვებს "ნერაძურის".
ინტერმა ლუის ერნიკეს სანაცვლოდ €23/24 მილიონამდე გადაიხადა, ხოლო ენდი დიუფი €25 მილიონად შეიძინა. ლუის ენრიკემ ამ სეზონში 8 მატჩის ჩატარება მოასწრო და მის ანგარიშზე 0 გოლი და 0 საგოლე გადაცემაა, ხოლო რაც შეეხება ენდი დიუფს, 22 წლის ფრანგმა მხოლოდ 2-ჯერ ითამაშა.
ზემოხსენებული ფეხბურთელებიდან ლუის ენრიკეს გაყიდვა პირდაპირ იგეგმება, ხოლო დიუფი დიდი ალბათობით ინტერს იჯარის წესით დატოვებს. ზამთრის სატრანსფერო ფანჯრის მოახლოებასთან ერთად, ამ ფეხბურთელების თაობაზე უფრო მეტი ინფორმაცია გახდება ცნობილი.
