ევროპის მასშტაბით, ტოპ ქვეყნებში სატრანსფერო ფანჯარა სულ რაღაც ორ კვირაში იხურება. დარჩენილ დღეებში მოსალოდნელია, რომ საკმაოდ ბევრი გარიგება განხორციელდება და ამ სიაში შეიძლება ქართველი ფეხბურთელი ზურიკო დავითაშვილიც მოხვდეს. 24 ვინგერს სენტ-ეტიენის დატოვება ამ დრომდე სურს, შესაბამისად, მის თაობაზე უახლოეს პერიოდში სიახლეებს ველოდებით.
როგორც ირკვევა, ქართველი შემტევი ბეშიქთაშის ერთ-ერთ მთავარ სამიზნედ კვლავ რჩება. თურქული გრანდი, რომ ზურიკო დავითაშვილით სეროზულად ინტერესდებოდა, ამის შესახებ პირველად ივნისის თვეში გაცნობეთ. მას შემდეგ საკმაოდ დიდი დრო გავიდა, თუმცა როგორც ჩანს, ბეშიქთაშის ინტერესი კვლავ რეალურია.
ოლე გუნერ სულშერის გუნდი ახალ ვინგერს ეძებს და მარცხენა ფლანგზე 3 ფეხბურთელს განიხილავს. ზურიკო დავითაშვილის გარდა სიაში არიან ჯეიდონ სანჩო (მანჩესტერ იუნაიტედი) და არმან ლორიენტე (სასუოლო). 25 წლის ინგლისელი ფეხბურთელი რომაში გადასვლასთან იყო ახლოს, ამის შესახებ რამდენიმე დღის წინ ჩვენც გაცნობეთ, თუმცა ჯეიდონ სანჩომ "ჯალოროსის" შემოთავაზება დაბლოკა, შესაბამისად, ბეშიქთაშში მის დამატებას კვლავ განიხილავენ.
უახლოეს დღეებში თურქულ გრანდში სასურველ კანდიდატურას შეარჩევენ და ტრანსფერზე მუშაობას დაიწყებენ. ზურიკო დავითაშვილი მოლოდინის რეჟიმშია, მის პოტენციურ ტრანსფერზე კი სიახლეებს ველოდებით. ქართველი ფეხბურთელის სიტუაციას სხვა კლუბებიც ყურადღებით აკვირდებიან.
